Doni të bëni zhytje? Kaloni nga dentisti

Një dhimbje dhëmbësh gjatë zhytjes nën ujë ka çuar Vinisha Ranna, studente universitare në Buffalo school of dental medicine në New York, që të reflektojë rreth lidhjes midis aktivitetit nënujor dhe shëndetit të dhëmbëve.

"Studimi i sapo kryer ka dëshmuar se një lidhje ekziston, edhe pse nuk është e mundur të flitet për një lidhje shkak-pasojë midis zhytjes dhe problemeve dentare" afirmon kërkuesja që ka publikuar rezultatet e analizës në revistën "British dental journal"."Kush do të bëjë zhytje duhet t'i nënshtrohet një skaneri për të verifikuar kushtet e shëndetit të përgjithshëm, por në check up nuk përfshihet asnjë kontroll dentar", vijon Ranna, që bashkë me kolegët ka përfshirë në studim qindra zhytës amatorë duke i pyetur nëse kishin eksperimentuar ndonjëherë dhimbje ose probleme te dhëmbët gjatë ose pas zhytjes. Në veçanti, 42 % e pjesëmarrësve është përballur me atë që në terma teknik përkufizohet barodontalgia ose një dhimbje e dhëmbëve që lidhet me ndryshimet e presionit.

"Rreth një e katërta e zhytësve të përfshirë në kërkim, ka pasur dhimbje dhëmbësh që lidhej me furnizuesin e ajrit që duhet të mbahet në gojë gjatë zhytjes dhe 22 % ka pasur dhimbje në nofull", vijojnë autorët që më pas shtojnë: "Në 5 % të pjesëmarrësve janë verifikuar probleme me kurorat e pranishme dhe në një rast me një mbushje".

Siç kujtojnë ekspertët, nga momenti që furnizuesi i ajrit duhet të mbahet në gojë gjatë gjithë kohëzgjatjes së zhytjes, çdo problem i tipit stomatologjik potencialisht mund të rrisë riskun e dëmtimeve në shëndetin oral të zhytësve. "Shqetësimet e dhëmbëve, gingivave dhe nofullës janë më të dukshme nën ujë se sa në sipërfaqe dhe për këtë është e rëndësishme të kalojmë nga dentisti para se t'i dedikohemi zhytjes nënujore ose direkt pas zhytjes, nëse shqetësime të tilla janë shfaqur" përfundon Ranna.

Burimi: Dica33.it

Përktheu: Erjola Taga