Shqipëria renditet e fundit për përkujdesjen ndaj dhëmbëve

Shqiptarët ende nuk e kanë kthyer në edukatë vetjake kujdesin për dhëmbët. Ndonëse tanimë furça e dhëmbëve duhet përdorur edhe te kicat e bebeve dhe për këtë qëllim ka dhe kolinozë të posaçëm, duket se si çdo gjë tjetër në Shqipëri edhe me këtë kujdes shëndetësor pajtohen më me vonesë. Mjekët stomatologë duke iu referuar studimeve të vendit dhe atyre evropiane thonë se 80% e 12-vjeçarëve kanë probleme me shëndetin e tyre oral. Kjo do të thotë se një i mitur në këtë moshë ka 3-4 dhëmbë me probleme. Krahasuar me vendet evropiane, renditemi të fundit përsa i takon përkujdesjes ndaj tyre.

Shqiptarët ende kanë probleme me shëndetin e tyre oral. Jemi larg kujdesjes dhe higjienës krahasuar me vendet evropiane, ndërsa me vendet e rajonit nuk ka ndonjë diferencë të madhe.
Dorian Hysi, stomatolog dhe pedagog i stomatologjisë i referohet një studimi të kryer në nivel kombëtar kur thotë se 80% e 12 vjeçarëve kanë probleme me shëndetin oral.

"Një individ i grupmoshës 12 vjeçare ka mesatarisht në gojë 3-4 dhëmbë të prishur, të hequr ose të mbushur. Ndërsa si përqindje e sëmundshmërisë, pra sa përqind të kësaj popullate prek kjo sëmundshmëri, është pak e lartë tek 80%. Pra 80% e kësaj popullate kanë pasur një eksperiencë të prishjes së dhëmbëve", shprehet pedagogu i stomatologjisë.
Për ekspertët e fushës, pamundësia ekonomike dhe mungesa e ndërgjegjësimit, janë dy nga faktorët që i detyrojnë pacientët të kërkojnë heqjen e dhëmbëve të sëmurë në vend të implantimit të tyre.

" Rritja e prevalencës së ekstraksioneve të dhëmbëve, nuk ka ndodhur vetëm tek ne. Ne kemi bërë një studim me disa kolegë britanikë në 18 vende të Evropës Lindore, shtresa e mesme dhe shtresa e lartë vazhdon të ketë të njëjtën tendencë kujdesi, parandalimi. Shtresa e ulët, ka problemin e financimit për trajtimin e këtyre patologjive dhe si pasojë detyrohen t'i heqin dhëmbët duke mos e përballuar dot trajtimin e këtyre patologjive."

Edhe përsa i takon shpenzimeve për kujdesin e shëndetit oral, të dhënat tregojnë se shqiptarët shpenzojnë vetëm 1.5 euro në muaj, ndërsa shqiptarët e Kosovës 1.9 euro dhe furça e dhëmbëve nuk ndërrohet mesatarisht 1 herë në 3 muaj.

Alma Demiraj