Kurimi i të moshuarve: si duhet të evoluojë klinika?

Ndërsa popullsia e vendeve të industrializuara po plaket, ekspertët hamendësojnë se një nga specializimet e mundshme për stomatologjinë në të ardhmen është kurimi i të moshuarve. Si duhet të zhvillohet pra klinika dentare?
Klinika dentare duhet të përshtatet ndaj kërkesave të moshuarve dhe ndaj problemeve që ata mund të hasin në qasjen e tyre, duke parashikuar për shembull praninë e ashensorëve që ata të mund t'i arrijnë ose të portave më të gjera se normalja që të lejojnë një akses komod për personat që përdorin instrumente që ndihmojnë lëvizshmërinë dhe të karrocave dhe karrigeve të transportit.
Fjalë të Daniel Kandelman, drejtor i International Center of Prevention of Dental Diseases për Specific Need Populations dhe profesor pranë fakultetit të Stomatologjisë në Universitetin e Montreal-it në Kanada, intervistuar nga Gazeta e Stomatologjisë rreth kësaj teme.
"Dhe orenditë që përbëjnë klinikën duhet të jenë të modifikuara, duke zgjedhur për shembull kolltukë të përshtatshëm dhe karrige komode në sallën e pritjes.
Stomatologu dhe ekipi i tij duhet që të kenë një përgatitje që të jenë shumë të durueshëm me personat e moshuar, të flasin ngadalë me një ton zëri të lartë në mënyrë që ata të mund të kuptojnë dhe të kenë kohë që të përballen me vështirësitë e tyre; personat e moshuar në fakt kanë nevojë për më shumë durim dhe që t'i kuptojmë më shumë në krahasim me të rritur e tjerë në moshë më të re".

Kurat në shtëpi
"Stomatologët që dëshirojnë që të kurojnë pacientë që nuk mund të lëvizin dhe që gjenden në vështirësi në shtëpi apo në institutet e kurimit, duhet të pajisen me instrumente dhe makineri stomatologjike të transportueshme dhe të mësojnë të trajtojnë personat që duhet të mbeten të shtrirë në shtrat.
Duhet të kihet parasysh se rreth 10% e popullsisë mbi 75 vjeç është e përbërë nga persona që nuk mund të dalin nga shtëpia ose që janë të shtruar në institute kurimi".

Ku mund të fitojë profesionisti aftësitë që i nevojiten?
"Që të mund të përgatisim stomatologët që të përballen me gjithë këto kërkesa është shumë e rëndësishme që të përfshijmë leksione të stomatologjisë geriatrike në fazën fillestare të kursit të studimeve të diplomimit në Stomatologji. Lëndët që duhet të thellohen janë ekzaminimi i kancerit oral, implantologjia dhe mirëmbajtja e implanteve, farmakologjia, trajtimi i pacientëve që nuk mund të arrijnë klinikën, trajtimi i kariesit radikolar me teknika që bazohen në përdorimin e GICs (cement glasionomer), pastërtia dhe mbajtja e protezave dhe e kurave lehtësuese për pacientët me kserostomi të rëndë.
Lëndët e këtij listimi, jo ezaurues, duhet të integrohen në kurrikulën akademike të viteve të para të studimit të studentëve të Stomatologjisë, që në të ardhmen e afërt do të përballen gjithmonë me trajtimin e pacientëve të moshuar në klinikat e tyre.
Stomatologët që më pas do të zgjidhnin të specializoheshin në Stomatologjinë geriatrike duhet, sipas pikëpamjes sime, që të formohen me kurse pas universitare që t'i vënë në kushte që të shpenzojnë pjesën më të madhe të kohës së tyre duke bashkëpunuar me autoritetet shëndetësore në programe të Stomatologjisë së komunitetit dhe në aktivitete klinike që i drejtohen kryesisht pacientëve që nuk mund të arrijnë vendet e kurimit".

Përktheu: Erjola Taga