"Lemeria nga dentisti" mund të parandalohet që në vegjëli. Këshillat e dentistëve pediatër amerikanë

Studimet e kohëve të fundit kanë treguar se një shëndet i mirë oral mund të përmirësojë rendimentin në shkollë të fëmijës dhe zhvillim e tij psikosocial. Një jetë plot "buzëqeshje të shëndetshme" është dhurata më e mirë që mund, si prindër, t'i bëjmë fëmijëve tanë. Të mësosh fëmijët që të shkojnë rregullisht te dentisti pa ankthe apo frikë duke krijuar një atmosferë relaksuese është një objektiv i mundshëm, siç na shpjegojnë Jeffrey P. Huston DDS dhe A. Jeffrey Wood DDS anëtarë të California Society of Pediatric Dentistry.

Këto janë këshillat e tyre që duhet t'i transmetohen prindërve:

Në vitin e parë të jetës:
Vizita e parë te dentisti duhet të ndodhë në vitin e parë të jetës edhe nëse janë të dukshme vetëm pak dhëmbë qumështi, kjo ndihmon në familjarizimin me klinikën dentare. Sipas një studimi të kohëve të fundit duke filluar shumë herët me vizitat reduktohen kostot e shëndetit oral dhe krijohen pacientë të rritur "të përgjegjshëm". Vizita e parë luan një rol të rëndësishëm si guidë parandaluese drejt një shëndeti oral korrekt. Paralajmërojmë prindërit për zakonet e këqija: të pish lëngje me sheqer midis vakteve apo përdorimi i biberonit me qumësht dhe mjaltë gjatë natës. Japim udhëzime se si të pastrojnë dhëmbët dhe gingivat e fëmijës, diskutojmë përfitimet e fluorit dhe për mënyrën më të mirë të administrimit, kujtojmë se pasta e dhëmbëve nuk shërben për "barkun" dhe nuk duhet gëlltitur.

Çfarë duhet të bëjmë në shtëpi:
Dihet se "frika nga dentisti" mund të prekë fëmijët pasi nivelet fobike janë të zakonshme në familje. Sipas studimeve të kohëve të fundit baballarët më shumë se nënat, luajnë rol në transmetimin e fobisë. Vizita e hershme mund të shërbejë për të thyer këtë rreth vicioz. Fëmija duhet përgatitur para vizitës duke minimizuar frikën nga e panjohura. Dentisti kalon minuta të rëndësishme duke biseduar dhe treguar si një lojë se çfarë do të ndodhë para se të bëjë çfarëdo lloj veprimi. Kjo për të reduktuar nervozizmin dhe për të krijuar një raport besimi.

Faktet kanë rëndësi më shumë se fjalët:
Prindërit dhe edukuesit në përgjithësi duhet të kujdesen për gojën e tyre para se të fillojnë që t'i tregojnë fëmijëve se si të sillen. Të eliminosh zakone të pashëndetshme si konsumimi i vakteve me sheqer apo pijeve të gazuara midis vakteve dhe të tjera, mund të kushtëzojë sjelljen në të ushqyer te fëmijët për të gjithë jetën e tyre. "Lemeria nga dentisti" gjenerohet nga faktorë të shumtë dhe mund të reduktohet duke u përpjekur që të aplikojmë si prindër, edukues apo kurues teknikën që psikologët e quajnë "modeli i kushtëzimit". Një shembull për të gjithë: lani dhëmbët në prani të fëmijës tuaj duke filluar që nga viti i parë i jetës. Kur e shoqëron fëmijën te dentisti "ruaj qetësinë", ji pozitiv dhe buzëqesh sikur po shkon në vendin tënd të preferuar. Fëmijët kuptojnë shumë mirë gjuhën jo verbale të trupit dhe nuk duhet të transmetojmë tension. Qëllimi është që të krijojmë një adult të vetëdijshëm për rëndësinë e parandalimit që me shumë qetësi zhvillohet nga dentisti apo nga një tjetër specialist i shëndetit për kontrollet periodike.

Ajo që injoron mund të jetë e dëmshme:
Jo të gjithë e dinë se kariesi i dhëmbëve të qumështit mund të fillojë që në moshën 2 muaj; që është sëmundja kronike më e përhapur te fëmijët në të gjithë planetin. Një e katërta e të porsalindurve infektohet nga bakteret orale të prindit apo të kujdestares, kjo do të thotë se prej mijëra vjetësh mikroorganizmat kariogjene janë transmetuar në pështymën e qenieve njerëzore nga brezi në brez. Për t'u riprodhuar në pështymë bakteret kanë nevojë për sheqerna të thjeshtë dhe në "sugar-loving-society" (shoqërinë tonë sheqer dashëse) përftojnë lehtësisht ushqim për t'u rritur pa masë në gojët tona. Acidet e prodhuara nga bakteret tresin kristalet e smaltit të dhëmbëve deri në "shpim": ky është kariesi. Të parandalosh transmetimin e baktereve të kariesit te fëmija yt është më e thjeshtë nga sa mendoni: mos vendos lugën që ke lëpirë në gojën e fëmijës tënd, mos ndaj lugën tënde me të dhe aq më tepër furçën e dhëmbëve. Mos e puth fëmijën tënd në buzë nëse ke një karies të hapur apo sëmundje periodontale.

Para se kariesi të godasë:
Për të minimizuar stresin e kurave stomatologjike duhet të identifikojmë fëmijët me risk të lartë. Sipas American Academy of Pediatric Dentistry (AAPD), nevojitet që të kërkojmë paraprakisht njollat e bardha (White Spot) në dentinë duke filluar që në moshën tre vjeçare për të identifikuar subjektin në risk për patologji karioze. Këtyre fëmijëve i ofrojmë një program parandalimi të izoluar me fluorizime, kontroll të higjienës dhe ushqyerjes që mund të ndryshojë ecurinë e kariesit.
Kur shfaqen molarët e parë te të rriturit duke filluar nga pesë vjeç e gjysmë është e rëndësishme që t'i mbrojmë me "silant". Studime të kohëve të fundit dëshmojnë se silanti i shoqëruar me udhëzime të higjienës redukton me 50% riskun e kariesit.

Nëse kariesi ka ardhur tashmë:
Situata nuk duhet dramatizuar por kurimi duhet të kryhet menjëherë. Kjo çon në heqjen e smaltit të demineralizuar dhe zëvendësimin e tij me një mbushje në rezinë kompozitë. Nëse pacienti i vogël nuk është akoma plotësisht bashkëpunues parashikohet një mbushje provizore dhe rivlerësohet në distancë. Truket e përdorura për të hutuar fëmijët janë nga më të ndryshmit, që nga kënga deri te hunda e klounit. Rezultate të mira përftohen me një tablet që përveç se huton pacientin e vogël mund të përdoret me aplikacionet e duhura për Edutainment pra argëtimin edukativ mbi higjienën dhe ushqyerjen.

Nën kujdesin e: Davis Cussotto, Stomatolog Twitter @DavisCussotto