Më 17-18 nëntor, Konferenca e 23-të Kombëtare Dentare

Zhvillohet më 17-18 nëntor, në Hotel Tirana International, Konferenca e 23-të Kombëtare Dentare, ku si çdo vit ky aktivitet do të kthehet në një pikëtakim të eksperiencave ndërkombëtare dhe kombëtare të referuara nga lektorë të huaj dhe vendas. Tematikat e përzgjedhura do të përfshijnë të gjitha specialitetet: Implantologji, Ortodonci, Endodonti, Protetikë, Kirurgji Maksilo-Faciale, Radiologji, etj. Përveç leksioneve të fokusuara në një specialitet të caktuar, do të ketë edhe leksione të cilat paraqesin interes të përgjithshëm si p.sh.: trajtimi i njollave të bardha në dhëmbë, trajtimi multidisiplinar, rëndësia e dixhitalizimit në dentistri, etj. Leksionet në lidhje me teknikat e fundit laboratorike, do të vijnë nga emra me eksperiencë të gjatë në këtë fushë dhe sigurisht si mjekët ashtu edhe laborantët dentarë do të kenë diçka më tepër për të mësuar.

Është menduar që një hapësirë t'i kushtohet edhe menaxhimit dentar si në aspektin financiar, ashtu edhe në atë psikologjik si pjesë shumë e rëndësishme e suksesit në punën tuaj. Për të mos harruar Panairin Dentar më të madh në vit, ku mblidhen me dhjetëra distributorë të fuqishëm në vend që promovojnë materialet e tyre dhe teknologjitë më të fundit të dentistrisë në botë. Ata do të ofrojnë për ju edhe Workshope të ndryshme ku secili do të ketë diçka më shumë për të mësuar.

Aktiviteti është në proces akreditimi nga Qendra Kombëtare e Edukimit në Vazhdim. Ai është akredituar gjithashtu në Kosovë. Afati i fundit i regjistrimit është data 10 Nëntor 2017. Për më shumë informacion klikoni këtu.