Ksilitoli, sheqeri që mbron nga kariesi

Të mbrosh dhëmbët nga kariesi me sheqer. E pamendueshme deri pak kohë më parë, por tani studimet dëshmojnë të kundërtën. Substanca në fjalë është ksilitoli, protagoniste e një kërkimi plotësisht italian i publikuar në revistën shkencore Clinical oral investigation dhe paraqitur së fundi në Oslo, gjatë kongresit të 64-t, European organisation for caries research (Orca).

"Kariesi shkaktohet nga ndërveprimi i faktorëve të ndryshëm mjedisorë me gojën tonë. Në mënyrë të veçantë faktorët biologjikë, socialë, të sjelljes dhe dieta ndikojnë në formimin e një biofilmi oral, që të gjithë ne e njohim me emrin e pllakës bakteriale" nënvizon Laura Strohmenger, Drejtoreshë Uoc e Stomatologjisë dhe parandalimit Oral A.O., San Paolo në Milano. "Por jo e gjithë pllaka bakteriale sillet në të njëjtën mënyrë. Në fakt sheqernat përfaqësojnë një faktor nxitës për zhvillimin e pllakës kariogjene". Ndryshe është rasti me ksilitolin. "Një studim i mëparshëm i yni e kishte treguar tashmë se një dozë e lartë ksilitoli e administruar për 6 muaj zvogëlon riskun për karies me rreth 80% në dy vitet në vazhdim", vijon Strohmenger.

"Pra, pyesim veten nëse doza të ulëta ksilitoli do të ishin efikase edhe te të rriturit. Për këtë kemi regjistruar 130 vullnetarë midis 35 dhe 44 vjeç që konsumonin këtë sasi ksilitoli nëpërmjet 5 çamçakëzëve në ditë.
Vullnetarët janë ndarë në dy grupe: i pari duhej të përtypte 5 çamçakëzë në ditë që përmbanin ksilitol, ndërsa grupi i dytë ai i kontrollit duhej të përtypte 5 çamçakëzë pa sheqer dhe pa ksilitol. Studimi ka zgjatur dy vjet në total. Vetëm në vitin e parë vullnetarët kanë përtypur çamçakëz. Viti i dytë ka qenë vetëm për vëzhgimin e efekteve afatgjatë.

Rezultatet kanë nxjerrë në pah se si kapaciteti i pllakës bakteriale për të gjeneruar acide është zvogëluar lehtësisht në grupin e kontrollit pa sjellë ndryshime domethënëse, ndërsa në grupin me ksilitol zvogëlimi ka qenë më i ndjeshëm duke arritur një variacion statistikisht domethënës në krahasim me vlerat fillestare. Gjithashtu efekte të tilla janë ruajtur edhe pas 12 muajsh përtypje deri në 24 muajt e fundit. Në grupin e kontrollin nuk është hasur asnjë variacion i baktereve kariogjene në harkun e studimit, në të kundërt nga grupi me ksilitol bakteret kariogjene janë zvogëluar gjatë 12 muajve të përtypjes dhe janë mbajtur në nivele më të ulëta deri në kontrollin final. Gjenerimi dhe progresi i kariesit është zvogëluar me 23% në grupin e ksilitolit në krahasim me grupin e kontrollit në të cilin janë verifikuar 120 ndërhyrje me mbushje dhe 27 ekstraksione, numra që zbrisnin respektivisht në 82 dhe 19 në grupin me ksilitol"

Përktheu: Erjola Taga