Incidenca e fenestrimeve kockore natyrale jo jatrogjene në popullsinë italiane

Defektet kockore si çarjet dhe fenestrimet mund të jenë të zakonshme në dhëmbët natyralë dhe hasen më shpesh në dhëmbët anteriorë dhe në kockën faciale më shumë se në kockën linguale (Steier 2015). Fenestrimet janë zona të izoluara në të cilat rrënjët janë të zhveshura nga veshja kockore, pak a shumë gjerësisht dhe në këto zona janë të mbuluara vetëm nga periostiumi dhe nga gingiva e sipër vendosur. Kocka marginale e fenestrimeve është e paprekur.

Diagnoza klinike e fenestrimit është një sfidë. Imazheria diagnostikuese radiografike tradicionale arrin shumë rrallë që të zbulojë fenestrimet [Bagis 2015].
Fenestrimet mund edhe të jenë rezultat i një gabimi jatrogjen në stomatologjinë implantare në trajtimet ortodontike, kirurgjikale dhe periodontale. Në fenestrimet me origjinë implantare për shembull do të kemi ekspozim parcial të implantit. Fenestrimet që verifikohen në implantologjinë dentare janë të ndara në dy raste:
• Të klasës 1 që përfaqësojnë një penetrim më të vogël të implantit nëpërmjet pllakës kockore të paprekur.
• Të klasës 2 me formimin e një konveksiteti që mbyll një "porcion domethënës të implantit të ekspozuar".
Dallimi midis këtyre dy klasave të fenestrimeve është i rëndësishëm pasi masat e riparimit dhe trajtimit janë të ndryshme.

Rreth incidencës së fenestrimeve natyrale kockore janë kryer një numër i kufizuar kërkimesh në literaturë dhe pjesa më e madhe e këtyre janë kryer në kafkat e kufomave, pa pasur parasysh trajtimet e mëparshme dentare, ndër të cilat ekstraksionet, kirurgjinë periodontale dhe terapinë ortodontike.
Në një studim të kohëve të fundit në International Journal of Dentistry vlerësohet incidenca dhe vendndodhja e fenestrimeve duke përdorur si test diagnostikues Cone Beam (CBCT) në një popullsi të re italiane që nuk kishte kryer asnjë trajtim dentar të mëparshëm.

Autorët e këtij studimi kanë marrë në konsideratë 50 pacientë në moshë nga 18 në 30 vjeç që kishin kryer paraprakisht CBCT për të planifikuar heqjen e molarit të tretë ose terapinë ortodontike. Asnjë trajtim i mëparshëm dentar nuk është kryer në këto pacientë në mënyrë të tillë që të përjashtojnë çdo fenestrim që lidhet me një gabim jatrogjen për trajtimet stomatologjike. Në tërësi janë vlerësuar 1.395 dhëmbë. Fenestrimet e rrënjëve janë identifikuar në bazë të përkufizimeve të Davies dhe të American Association of Endodontists. Të dhënat janë mbledhur dhe analizuar në mënyrë statistikore.

Fenestrimet janë vërejtur në 159 dhëmbë nga 1.395 (11% e dhëmbëve). Në mandibul janë zbuluar 68 fenestrime dhe në maksilë 91 (6,5%). Incizivët kanë rezultuar të jenë dhëmbët me incidencën më të lartë të fenestrimeve.
Fenestrimet natyrale kockore janë rezultate anatomike të paparashikueshme, të vështira për t'u diagnostikuar me teknikën klinike dhe radiografike tradicionale. Është e rëndësishme që të diagnostikojmë këto defekte para çdo ndërhyrje kirurgjikale, implantare apo terapie ortodontike pasi fenestrimet e pazbuluara mund të ndikojnë negativisht në rezultatin klinik të këtyre trajtimeve. Zbulimi i zakonshëm që lidhet me fenestrimet në një popullsi italiane mbështet nevojën për një testim CBCT preoperator për të diagnostikuar me precizion praninë incizale të fenestrimeve për një qasje kirurgjikale/implantare më precize dhe të besueshme.

Nën kujdesin e: Lara Figini, Koordinatore Shkencore Odontoiatria33

Për më tepër:
• Successful dental implant placement surgeries with buccal bone fenestrations.Steier L., Steier G. Journal of Oral Implantology.2015;41(1):112-118
• Comparison of intraoral radiography and cone-beam computed tomography for the detection of periodontal defects: An in vitro study.Bagis N., Kolsuz M. E., Kursun S., Orhan K. BMC Oral Health.2015;15(1, article no. 64
• Detection of Bone Defects Using CBCT Exam in an Italian Population. Gambarini G, Miccoli G, Gaimari G, Pompei D, Pilloni A, Piasecki L, Al-Sudani D, Di Nardo D, Testarelli L. Int J Dent. 2017;2017

Përktheu: Erjola Taga