Kura farmakologjike kundër bruksizmit

Studimet e kohëve të fundit që kanë të bëjnë me bruksizmin dëshmojnë se procesi fiziologjik që i jep origjinë çrregullimit lind nga një mikrozgjim më i fortë se normali, pra nga një aktivizim shumë i shkurtër i sistemit nervor simpatik. Aktivizimi i sistemit nervor simpatik që verifikohet gjatë mikrozgjimit bën të mundur që muskujt ngritës (temporal, maseter dhe pterigoid medial) dhe muskujt ulës (milohioid, geniohioid dhe digastrik) aktivizohen njëkohësisht duke i lënë vendin një kontraktimi, gjë që në përtypje nuk ndodh kurrë.

Të zbulosh se cilat janë saktësisht karakteristikat fiziologjike të bruksizmit gjatë natës, është shumë e rëndësishme sepse mund t'i hapë rrugën trajtimeve deri më sot të pamenduara.
"Sot me njohuritë që disponojmë - afirmon Grilles Lavigne, përgjegjës i laboratorit të neurofiziologjisë klinike dhe docent pranë fakultetit të stomatologjisë së Universitetit të Montreal, Kanada - kemi mundur që të kryejmë studime farmakologjike në substanca të afta që të parandalojnë ngacmimin e tepërt të sistemit nervor simpatik. Klonidina, për shembull është një substancë që reagon në sistemin kardiak duke favorizuar aktivitetin e sistemit nervor parasimpatik në krahasim me atë simpatik dhe zvogëlon intensitetin e mikrozgjimeve: me këtë përftohet një reduktim me 60% i bruksizmit gjatë natës në individë të predispozuar".

Duke vijuar me hetimet në këtë rrugë, mbase mund të gjenden substanca të tjera që japin rezultate më të mira dhe që të jenë në gjendje të shmangin efektet anësore negative të klonidinës e cila nxit një hipotension të zgjatur në kohë mëngjesin tjetër pas konsumimit.

Debora Bellinzani

Përktheu: Erjola Taga