Pema e "furçave" bën mirë edhe për shëndetin

Nga Euclea natalensis një përbërje natyrale shumë efikase kundër bakterit të tuberkulozit

Nga Cosma Capobianco

Euclea natalensis, ose siç njihet më thjesht në Afrikën e Jugut "pema e furçave" po nxit interesin e kërkuesve duke qenë se ofron një mundësi për një medikament të ri kundër tuberkulozit. Në Afrikë dhe në Lindjen e Mesme degët e saj përdoren për higjienën orale duke qenë se fundet e tyre kur bien në kontakt me pështymën zgjerohen dhe ngjajnë me fijet e një furçeje të zakonshme.

Tashmë është zbuluar se Euclea natalensis përmban edhe një substancë potencialisht aktive kundër bakterit të tuberkulozit, një bakter ky që është shqetësues për shkak të rezistencës së tij në rritje ndaj antibiotikëve dhe për shkak të mungesës së një vaksine efikase. Më saktësisht bëhet fjalë për diospirinën, që nga ana kimike është një naftokinon, një kategori e përbërjeve kimike me veprim të fortë antibakterial të pranishme vetëm në disa lloje bimësh. Diospirina ka treguar se është e aftë të inaktivizojë enzimën ADN-girazë dhe këtu qëndron interesi i studiuesve për variantin antibiotiko-rezistent të bacilit të Koch që vitet e fundit po përhapet gjithnjë e më shumë. Edhe pse dentistët janë konsideruar në risk të ulët për ekspozimin kundrejt pacientëve me tuberkuloz aktiv, sidoqoftë nuk duhen harruar rekomandimet për parandalimin dhe diagnozën e parakohshme.

Me interes kryesor për dentistët është transmetimi nëpërmjet rrugëve respiratore përmes pjesëzave të infektuara që mund të qëndrojnë pezull në ajër për disa orë ndërkohë që mikrobakteret mbijetojnë në ambient edhe për disa muaj. Deri më tani rezultojnë të dokumentuar pak raste të transmetimit nga pacienti te dentisti dhe gjithashtu është e ulët edhe norma e konvertimit të testit kutan të tuberkulinës. Është e rëndësishme që të mbajmë mend që maskat e zakonshme nuk mbrojnë dhe në rastin e pacientëve të dyshuar, duhet të përdoren ato me fuqi të lartë filtruese, si ato të tipit FFP2 (sipas normës EN149) me efikasitet minimal 95% kundër pjesëzave me përmasa deri në 0.6 ìm. Bëni kujdes edhe ndaj shenjave dhe simptomave të dyshimta: kollë persistente prej të paktën 3 javësh me ose pa temperaturë, anoreksi, astenia, djersitje gjatë natës, hemoptizë. Kush dëshiron që të ketë një bimë të Euclea natalensis në klinikë duhet të ketë parasysh që ajo është një pemë që ofron shumë më tepër sesa "furçat": frutat e saj janë të ngrënshme, lëvorja mund të përdoret në mjekime të ndryshme kundër dhimbjeve dhe infeksioneve, ndërsa rrënjët ofrojnë një ngjyrues të zi.

Burimi: Odontoiatria33

Përktheu: Valbona Spahia