Diabetikët dhe klorheksidina

Nga Adamo Calatroni

Kujdes nga kolutorët? Sigurisht që jo, nëse nuk janë situata shumë të veçanta. Ky është konkluzioni i një studimi të publikuar në një nga edicionet e fundit të gazetës së American Dental Association. Kolutorët në fjalë janë ato që përmbajnë klorheksidinë glukonat dhe publikimi vjen nga një studim klinik mbi efikasitetin e trajtimit periodontal te personat e moshuar që janë të prekur nga diabeti. Nën mbikëqyrjen e Linda C. McCoy, higjieniste dentare, në bashkëpunim me një ekip të kërkuesve të Boston University, kërkimi konfirmon një seri evidencash që janë nxjerrë në të shkuarën.

Përdorimi i klorheksidinës si antimikrobial në trajtimet periodontale ka qenë i gjerë, duke filluar nga vitet '70 dhe ka arritur rezultate të shkëlqyera kundër gingivitit dhe formimit të pllakës, megjithatë, janë evidentuar efekte anësore më shumë se pricipet bazë të kolutorëve, ashtu siç ishte evidentuar edhe vitin e kaluar në Italian Mouthwash Guidelines, udhëzimet e para që janë nxjerrë në lidhje me temën e përdorimit të kolutorëve për shëndetin oral.

Ky studim i ri ka marrë në ekzaminim 140 individë, persona të moshuar që banojnë në lokalitete të ndryshme të New England të cilët paraqisnin patologji periodontale dhe diabet pak të kontrolluar me nivele të hemoglobinës së glikuar mbi 8,5%. Protokolli i studimit, parashikonte, përveç të tjerash, pastrimin e gurëzave me ultra tinguj me larje sublinguale me klorheksidinë 0,12%, pastrimin manual dhe shpëlarje që pacienti duhej t'i bënte në shtëpi, dy herë në ditë për 4 muaj, gjithmonë me kolutor me klorheksidinë 0,12%. Rezultati i parë interesant që është sjellë nga kërkuesit amerikanë është frekuenca e efekteve anësore që janë hasur tek individët pjesëmarrës në studim: plot 31%, pra 44 persona. Por po të shohim në detaje fenomenet negative më të zakonshme që janë hasur janë ndryshimet në shije dhe njollat në dhëmbë si dhe me një incidencë më të vogël janë përshkruar dhimbja e fytit, dhimbje të gjuhës dhe kavitetit oral; irritim në majën e gjuhës; ndjesi të mungesës së frymëmarrjes; kongjestion nazal dhe disa shqetësime të tjera me incidencë minimale. Por sidoqoftë duhet përmendur që të gjitha këto simptoma kanë treguar se kanë një karakter kalimtar dhe zhduken shpejt pas ndërprerjes së administrimit të kolutorit dhe profilaksisë dentare. Rezultatet e këtij kërkimi sigurisht kanë edhe pasoja klinike të cilat janë shprehur nga vetë autorët: dentistët duhet të informojnë pacientët në lidhje me efektet e mundshme anësore të kolutorëve me bazë klorheksidinë glukonat dhe nëse shihet e arsyeshme, të ndërpritet administrimi dhe të ndërhyhet për të ndërprerë efektet anësore. Në çdo rast rekomandohet një monitorim i kujdesshëm.

Përktheu: Valbona Spahia