Analiza e efikasitetit dhe toksicitetit të anestetikëve lokalë në rastin e bllokut nervor alveolar inferior

Nga Lucia Sardi

Së fundmi janë publikuar dy rishikime sistematike të literaturës shkencore që analizojnë efikasitetin e solucioneve të ndryshme anestetike dhe riskun e dëmtimit neurologjik që mund të ndiqet nga administrimi i anestetikut për të arritur bllokun e nervit alveolar inferior.

Qëllimi i studimit
Qëllimi i rishikimit të parë sistematik ishte ai që të identifikohej solucioni anestetik që ishte në gjendje të ofronte anestezinë më të mirë pulpare në rastin e bllokimit të nervit alveolar inferior (IANB) kur dhëmbët mandibularë janë prekur nga pulpiti irreversibël.

Qëllimi i studimit të dytë, ishte që të përcaktohej nëse përdorimi i një solucioni të artikainës me 4% sjell një risk më të madh të dëmtimit të nervit alveolar inferior ose nervit lingual në krahasim me një solucion të lidokainës me 2%, kur administrohen për të arritur bllokun e nervit alveolar inferior.

Metoda
Për rishikimin e efikasitetit të solucioneve të ndryshme anestetike janë seleksionuar 11 studime klinike që krahasonin të paktën 2 solucione anestetike të ndryshme (lidokaina, artikaina, bupivakaina, prilokaina ose mepivakaina) të përdorura për bllokun e nervit alveolar inferior në rastin e pulpitit irreversibël. Të gjitha solucionet anestetike të përdorura përmbanin një vazokonstriktor.

Për rishikimin e studimeve mbi vlerësimin e toksicitetit të artikainës në krahasim me lidokainën janë zgjedhur 7 studime nga të cilët një i randomizuar i kontrolluar double blind dhe 6 studime retrospektive me kohorte.

Rezultate
Krahasimi ndërmjet efikasitetit të solucioneve të ndryshme anestetike ka treguar një normë suksesi të artikainës dhe të mepivakainës në mënyrë të konsiderueshme më të madhe sesa ajo e lidokainës, ndërkohë që nuk është zbuluar asnjë diferencë statistikisht e rëndësishme ndërmjet solucioneve të tjera anestetike.

Diskutim
Analiza statistike mbi efikasitetin e anestetikëve nuk ka marrë në konsideratë as sasinë e anestetikut të administruar për të marrë një dozë efikase, as të përqendrimit të vazokonstriktorit të pranishëm në sasi të ndryshueshme sipas studimit të analizuar. Përveç kësaj, nuk është marrë në konsideratë shkalla e dhimbjes pre-operative, që mund të influencojë negativisht efikasitetin e anestetikut të administruar.

Përdorimi i artikainës me 4% po bëhet gjithnjë e më i përhapur për shkak të efikasitetit të tij. Kjo, falë karakteristikave kimike, që arrin një anestezi të thellë dhe për një kohë të gjatë në pikën që shumë autorë këshillojnë anestezi me artikainë 4% për infiltrimin në zëvendësimin e bllokut të nervit alveolar.

Nga ana tjetër, janë publikuar shumë artikuj që lidhen me një neurotoksicitet më të madh të mundshëm të artikainës në lidhje me lidokainën dhe mepivakainën, që lidhet edhe me një përqendrim më të madh me të cilin ajo administrohet: megjithatë, sot, nuk është stabilizuar një marrëdhënie shkakësore ndërmjet përqendrimit më të madh të anestetikut dhe dëmtimit neurologjik të provokuar nga anestezia.

Përveç të tjerash një studim i vitit 2006 ka provuar se efikasiteti anestetik i një solucioni të artikainës 4% nuk ishte më efikas sesa një solucion me 3% ose me 2%.

Konkluzione
Të dy studimet dalin në përfundimin se artikaina ka një përqindje suksesi më të madhe ndaj lidokainës në bllokun e nervit alveolar inferior. Nuk ka evidenca shkencore që sugjerojnë se përdorimi i artikainës me 4% për bllokun e nervit alveolar inferior çon në një risk më të madh të dëmtimit neurologjik në krahasim me një solucion të lidokainës 2%.

Ajo mund të konsiderohet sidoqoftë një anestezi e sigurt dhe efikase edhe në rastin e bllokut të nervit alveolar inferior. Përveç të tjerash, risku i dëmtimit neurologjik do të reduktohet me kalimin e kohës nëse përdorimi i anestezisë për infiltrimin me artikainë 4%, në zëvendësimin e bllokut të degëzimit, do të mbështetet nga evidenca shkencore.

Implikime klinike dhe shkencore
Informacionet e ofruara nga të dy rishikimet i ofrojnë mjekëve një ndihmë të vlefshme në zgjedhjen e një anestetiku efikas kur duhet rritur probabiliteti i arritjes së një anestezie të vlefshme pulpare.

Është e dukshme që sidoqoftë mjekët duhet të vlerësojnë të gjithë risqet e mundshme dhe përfitimet e një solucioni anestetik përpara se ta përdorin.

Për më tepër, të gjithë autorët bien dakord mbi faktin se nevojiten studime të tjera klinike shkencore për të mbështetur këto konkluzione dhe për të studiuar përdorimin e solucioneve të artikainës më pak të përqendruar.

Për më tepër:
• Nagendrababu V, Pulikkotil SJ, Suresh A, Veettil SK, Bhatia S, Setzer FC. Efficacy of local anaesthetic solutions on the success of inferior alveolar nerve block in patients with irreversible pulpitis: a systematic review and network meta-analysis of randomized clinical trials. Int Endod J 2019;52:779-89.
• Stirrup P, Crean S. Does articaine, rather than lidocaine, increase the risk of nerve damage when administered for inferior alveolar nerve blocks in patients undergoing local anaesthesia for dental treatment? A mini systematic review of the literature. BDJ 2019;226:213-23.

Përktheu: Valbona Spahia