Azitromicina sistemike në trajtimin e hipertrofisë gingivale të induktuar nga barnat

Nga Lara Figini

Një efekt anësor i zakonshëm i konsumimit kronik sistemik të disa barnave, ndërmjet të cilave ciklosporina A (CsA), është hipertrofia gingivale. Ky komplikacion oral prek 21% - 35% të pacientëve që i nënshtrohen transplantit renal dhe mund të çojë në shqetësim estetik, dhimbje, inflamacion periodontal dhe humbje kockore.

Trajtimet terapeutike më të zakonshme janë kontrolli i pllakës bakteriale, pastrimi i gurëzave dhe lëmimi i rrënjës, apo kirurgjia periodontale ku përmendet gingivektomia.

Së fundmi këtyre metodave i është bashkuar edhe përdorimi i azitromicinës (AZM) në rrugë sistemike.

Nga ana biokimike, është demonstruar që AZM mund të përmirësojë simptomat e hipertrofisë gingivale (GO) të induktuar nga CsA, duke bllokuar proliferimin qelizor dhe grumbullimin e kolagjenit që induktohet nga CsA duke aktivizuar matricën metaloproteinazë-2 në fibroblastet gingivale.

Tipologjia e kërkimit dhe modaliteti i analizës
Në një rishikim të fundit sistematik, të publikuar në Oral Surgery Oral Medicine Oral Pathology Oral Radiology në dhjetor 2019, autorët kanë grumbulluar dhe vlerësuar studimet që kanë analizuar efektin e azitromicinës së administruar në rrugë sistemike (AM) mbi proliferimin gingival të ndërmjetësuar nga ciklosporina A (CsA) (GO).

Autorët kanë kërkuar të gjitha studimet e përshtatshme që janë publikuar në literaturë brenda datës 1 janar 2019, duke përdorur databaza tradicionale elektronike dhe duke kryer një kërkim manual. Janë përfshirë në rishikim të gjitha studimet klinike mbi njeriun (me >10 pacientë) të trajtuar për GO me administrim sistemik të AZM dhe follow-up 6 mujor, të publikuar në anglisht dhe gjermanisht.

Rezultate
Nga 266 tituj të identifikuar, në rishikimin përfundimtar janë përfshirë vetëm 6 publikime me të dhënat e 104 pacientëve. Është observuar një heterogjenitet i madh në termat e dimensionit të kampionit, regjimit të administrimit/dozimit të AZM, konsideratave të faktorëve të mundshëm konfondues dhe matjeve të GO.

Kohëzgjatja e trajtimit me AZM ndryshon nga 3-5 ditë me një dozim maksimal prej 500 mg/ditë. Përgjigjja gingivale është matur duke përdorur sisteme të ndryshme. Në të gjitha studimet e përfshira është dokumentuar një efekt i dobishëm i AZM së administruar në rrugë sistemike në termat e reduktimit të GO.

Konkluzione
Nga të dhënat e nxjerra nga ky rishikim, që duhet të konfirmohen me punime të tjera analoge, mund të dalim në përfundimin se azitromicina AZM e administruar në rrugë sistemike ka efekte të dobishme në reduktimin e GO të induktuar nga CsA.

Implikime klinike
Azitromicina mund të konsiderohet një alternativë e mundshme e reduktimit kirurgjikal të hipertrofisë gingivale të induktuar nga barnat, por ende studimet në këtë aspekt janë të limituar, prandaj nevojiten punime të tjera në lidhje me këtë temë.

Për më tepër:
Fuchs MD, Signer-Buset SL, Mendes S, Schmidt JC, Walter C. Does systemically administered azithromycin have an effect on gingival overgrowth? A systematic review. Oral Surg Oral Med Oral Pathol Oral Radiol 2019;128:606-14.

Përktheu: Valbona Spahia