Endodoncia pediatrike: një trajtim biologjik si alternativë e pulpektomisë

Nga Alessandra Abbà

Endodoncia është një trajtim shumë i zakonshëm në praktikën e stomatologjisë pediatrike dhe një tablo e patologjisë karioze me kanale radikolare të infektuar është një problem i përditshëm te dhëmbët e qumështit.

Pulpektomia është terapia që përdoret në këto situata. Ky trajtim synon heqjen e pulpës së infektuar nëpërmjet instrumenteve mekanike apo irrigimit dhe mbushjen e hapësirës endodontike me materiale të përshtatshme. Suksesi i terapisë, që konsiston në zhdukjen e shenjave dhe simptomave apo në rregullimin e eksfolimit të dhëmbit, nuk garantohet gjithmonë ndaj trajtimi mund të zgjatet dhe të komplikohet.

Një trajtim relativisht i ri është sterilizimi i lezioneve dhe terapia e riparimit të indeve (LSTR). Kjo terapi është një trajtim biologjik për lezionet karioze me ose pa përfshirjen e pulpës duke përdorur një përzierje me tre antibiotikë të ndryshëm (3Mix): metronidazol, ciprofloxacina dhe minociclina.

3Mix synon sterilizimin e pulpës nekrotike dhe dentinës radikolare të infektuar të dhëmbëve primarë. Përzierja është modifikuar më pas për një rezultat më të mirë klinik duke përdorur cefaclor në vend të minociclin dhe ornidazol në vend të metronidazolit.

Kjo terapi ka pasur rezultate të mira klinike, por nga ana tjetër ka pasur të dhëna radiografike të diskutueshme.

Tipologjia e kërkimit dhe modaliteti i analizës
Një studim i publikuar në J Indian Soc Pedod Prev Dent në 2019, ka vendosur objektivin e vlerësimit të suksesit klinik dhe radiografik të tre teknikave të ndryshme LSTR te molarët e qumështit.

Për studimin janë seleksionuar 50 fëmijë me moshë nga 4 - 8 vjeç. Dhëmbët e analizuar kanë qenë 63 molarë të parë dhe të dytë që kishin karies me përfshirje të puplës. Të dhënat klinike dhe radiografike janë regjistruar përpara trajtimit nga një profesionist. Dhëmbët janë ndarë rastësisht në tre grupe. Të gjithë trajtimet janë kryer nga i njëjti profesionist.

Çdo grup ka marrë trajtime të ndryshme:
• Grupi I: heqje vetëm të pulpës së kurorës dhe vendosje të një mjekimi me pastë antibiotike 3Mix të modifikuar në dhomën pulpare, ngjitje me cement glass-ionomer (20 dhëmbë);
• Grupi II: heqje e pulpës qoftë në kurorë qoftë në rrënjë dhe vendosje e një mjekimi me pastë antibiotike 3Mix të modifikuar në dhomën pulpare, ngjitje me GIC (21 dhëmbë);
• Grupi III: heqje e pulpës së kurorës dhe pozicionimi i një mjekimi me kloramfenikol, tetraciklinë dhe oksid zinku eugeno (CTZ) në dhomën pulpare, e ngjitur me GIC (22 dhëmbë).

Rezultate
Fëmijët janë ekzaminuar klinikisht me një follow-up prej 1, 6 dhe 12 muajsh, ndërsa në mënyrë radiografike për 6 dhe 12 muaj.

Suksesi klinik	1 muaj	6 muaj	12 muaj
Grupi I	100%	100%	90%
Grupi II	100%	100%	90,5%
Grupi III	100%	90,9%	81,8%

Asnjë diferencë statistikisht e rëndësishme nuk është gjetur ndërmjet tre grupeve në normat e suksesit klinik respektivisht për 1, 6 dhe 12 muaj.

Suksesi radiografik	6 muaj	12 muaj
Grupi I	95%	75%
Grupi II	95,2%	76,2%
Grupi III	90,9%	63,6%

Asnjë diferencë statistikisht e rëndësishme nuk është gjetur ndërmjet tre grupeve në normat e suksesit klinik respektivisht për 6 dhe 12 muaj.

Konkluzione
Në bazë të përqindjeve kompleksive të suksesit është e mundur të dalim në konkluzione se të tre teknikat e ndryshme kanë rezultuar efikase në terapinë e lezioneve karioze me përfshirje të pulpës dhe secila prej tyre mund të paraqesë një alternativë të pulpektomisë te dhëmbët e qumështit.

Megjithatë, mjekimi me pastë antibiotike 3Mix ka qenë më efikas, me ose pa heqje të pulpës radikolare.

Për më tepër:
Amolkumar Lokade, Seema Thakur, Parul Singhal, Deepak Chauhan, Chiranjeevi Jayam. Comparative evaluation of clinical and radiographic success of three different lesion sterilization and tissue repair techniques as treatment options in primary molars requiring pulpectomy: an in vivo study. J Indian Soc Pedod Prev Dent 2019;37(2):185-91.

Përktheu: Valbona Spahia