Mungesa e vitaminës D gjatë shtatzënisë shton rrezikun për hipoplazi të smaltit te fëmijët

Një studim publikuar së fundi në revistën "Pediatrics", ka zbuluar se ekziston një lidhje mes mungesës së vitaminës D gjatë tremujorit të dytë apo të tretë të shtatzënisë dhe zhvillimit të kariesit te foshnjat.

Duke supozuar se nivelet e pamjaftueshme të vitaminës D te gratë shtatzëna mund të ndikojnë në kalcifikimin e dhëmbëve duke rritur predispozitën për fillimin e kariesit, lezioneve dhe hipoplazisë së smaltit, është kryer një studim me qëllim verifikimin e hipotezave në fjalë. Studimi rekrutoi 207 gra shtatzëna nga një zonë urbane ekonomikisht e pafavorizuar, të cilat iu nënshtruan tërheqjes së një kampioni gjaku për të përcaktuar nivelet e 25-hidroksi vitaminës D, e cila përfaqëson formën më të bollshme të vitaminës D qarkulluese. Në vitin e parë të jetës, fëmijët e lindur prej tyre iu nënshtruan një vizite dentare nga një ekzaminues i cili nuk mori parasysh nivelet serike të vitaminës D të regjistruara te gratë shtatzëna.

33% e nënave pjesëmarrëse në këtë studim kishin nivele të ulëta të kësaj vitamine. Hipoplazia e smaltit u vu re në 22% të të porsalindurve, ndërsa 23% e tyre paraqitën lezione kavitare në dhëmbë. Nëse do të merren në konsideratë edhe fazat fillestare të sëmundjes, përqindja shkon në 36%. Nënat e fëmijëve me hipoplazi të smaltit shfaqën nivele shumë më të reduktuara të vitaminës D se nënat, fëmijët e të cilave nuk shfaqën probleme me dhëmbët (P=.05).

Analiza statistikore tregoi se hipoplazia e smaltit (P<.001) te fëmijët (P=.002) dhe nivelet e ulta të vitaminës D paralindjes (P=.02) ishin të lidhura në mënyrë të konsiderueshme me praninë e kariesit. Në përfundim, ky studim interesant konfirmoi se nivelet e ulëta të vitaminës D gjatë shtatzënisë mund të ketë një ndikim negativ në daljen dhëmbëve duke paraprirë edhe zhvillimin e hipoplazisë së smaltit te fëmijët.
Në fakt në një studim të kohëve të fundit është raportuar se nënat me nivele të ulëta të vitaminës D gjatë shatzanisë ishin më të rrezikuara për të lindur një fëmijë me peshë më të ulët për moshën gjestacionale. Tashmë është verifikuar se fëmijët me peshë të ulët në lindje kanë një risk më të lartë në krahasim me foshnjat me peshë normale për të zhvilluar hipoplazi të smaltit. Në dritën e gjithë kësaj, është e qartë se patologjitë e kavitetit oral duhet të konsiderohen dhe të trajtohen gjithnjë e më shumë në një këndvështrim më të përgjithshëm të shëndetit.

Schroth RJ, Lavelle C, Tate R, Bruce S, Billings RJ, Moffatt ME. Prenatal Vitamin D and Dental Caries in Infants.