Covid-19, rrezikohen më shumë meshkujt, të moshuarit dhe pacientët me komorbitete

Studimi kinez indikon se Koronavirusi në 80% të rasteve shkakton një gjendje gripale të thjeshtë. Më në risk janë pacientët e moshuar që kanë edhe sëmundje të tjera

Sipas një dokumenti të Chinese Centre for Disease Control and Prevention (Ccdc), të publikuar në Chinese Journal of Epidemiology, nga Covid-19 rrezikohen më shumë të moshuarit, pacientët që kanë sëmundje të tjera dhe personat e gjinisë mashkullore, e në 80% të rasteve shkakton një infeksion të lehtë.

Kërkuesit kinezë kanë analizuar mbi 72.314 raste (44.000 janë konfirmuar nga testi i acidit nukleik) me Covid-19 në Kinë, që nga fillimi i epidemisë deri në datën 11 shkurt. Analiza e situatës ka treguar se 80,9% e infeksioneve janë klasifikuar si të lehta, 13,8% si të rënda dhe vetëm 4.7% si kritike për jetën. Norma e vdekshmërisë ka qenë rreth 2,3%.
Nga 1.023 vdekje, pjesa më e madhe është verifikuar ndërmjet pacientëve me moshë të paktën 60 vjeç ose që kishin komorbitete si hipertensioni, sëmundjet kardiovaskulare dhe diabeti. Asnjë vdekje nuk është verifikuar te fëmijët. Nga një pikëpamje e përgjithshme, burrat kanë pasur probabilitet më të madh për vdekje (2,8%) në krahasim me gratë (1,7%).

Sipas ekspertëve kinezë, kurbat epidemike do të konfirmonin teorinë sipas së cilës verifikohen disa ngjarje të veçanta në tregun e peshkut në Wuhan, që do të lejonin një kalim të virusit nga një kafshë ende e panjohur për njeriun, në të cilën 2019-nCoV ka pësuar mutacione duke fituar mundësinë për t'ia transmetuar njerëzve të tjerë.

Ashtu si Sars dhe Mers, ekziston një risk i madh i mundshëm për personelin mjekësor, popullsinë në të cilën janë verifikuar sipas dokumentit 1.716 raste të konfirmuara. Deri në këtë moment, sipas autorëve, nuk ka prova të ngjarjeve "super shpërndarëse" në ndonjë strukturë që merret me pacientë me Covid-19. Kërkuesit afirmojnë se tendenca në zbritje e kurbës epidemike kompleksive sugjeron që izolimi i qyteteve, promovimi i sjelljeve të higjienës personale dhe e kërkesës për kurat dhe mobilizimin e skuadrave të përgjigjes së shpejtë në më shumë sektorë po ndihmojnë në kontrollimin e epidemisë.
Studimi, pavarësisht shtrirjes së tij të gjerë, paraqet disa limitime, si mungesa e të dhënave mbi ekspozimin e qytetit të Wuhan dhe mbi komorbitetet.

Si përfundim, ekspertët afirmojnë se, edhe pse epidemia duket se është në rënie, në momentin në të cilin shumica e personave do rikthehen në punë dhe në shkollë mund të ketë një tjetër shtim të rasteve.

Përktheu: Valbona Spahia