Ndikimi i ushqyerjes me gji në zhvillimin e kariesit dentar te fëmijët

Sipas rezultateve të një studimi të publikuar në "Pediatrics", të ushqesh me qumësht gjiri fëmijën deri në moshën 2 vjeçare ka një efekt të drejtpërdrejt në ashpërsinë e kariesit dentar primar dhe kjo vlen të përmendet pavarësisht nga konsumi i sheqerit gjatë jetës.

"Pavarësisht se janë të pranishme disa prova mbi rritjen e rrezikut për karies dentar te fëmijët e ushqyer me gji mbi moshën 12 muajshe, këto rezultate derivojnë nga studime shumë heterogjene dhe pa kontrolle për faktorët kyç ngatërrues", thotë autorja kryesore e studimit Karen Glazer Universiteti Adelaide në Australi. "Kemi dashur kështu të vlerësojmë se kohëzgjatja e ushqyerjes me gji do të ishte një faktor risku për kariesin dentar në dhëmbët e qumështit, pavarësisht konsumimit të sheqerit", shpjegon ajo.

Kërkuesit kanë studiuar shëndetin oral të 1.303 fëmijëve në një studim grupi të kryer në Brazilin jugor. Numri mesatar i sipërfaqeve dentare primare të shkatërruara, që mungojnë dhe të mbushura (DMFS) dhe karies të rëndë në fëmijërinë e hershme (S-ECC: DMFS më e madhe ose e barabartë me 6) është verifikuar në moshën 5 vjeçare.

Ekspozimi kryesor përfaqësohej nga ushqyerja me gji dhe të dhënat në krahasim me këtë janë grumbulluar që në lindje dhe në moshën 3, 12 dhe 24 muajsh, ndërsa të dhënat që lidhen me konsumin e sheqerit janë mbledhur në moshën 24, 48 dhe 60 muajsh. Prevalenca për S-ECC ka qenë 23,9% dhe numri mesatar i DMFS ishte 4,05.

Fëmijët që ushqeheshin me gji për një periudhë më të gjatë ose të barabartë me 24 muaj kishin një numër më të madh DMFS dhe një risk 2,4 herë më të lartë për të pasur S-EEC në krahasim me ata që ishin ushqyer me gji deri në moshën 12 muajsh. Ushqyerja me gji nga 13 deri në 23 muaj nuk ka rezultuar të ketë efekt në kariesin dentar.

"Ushqyerja me gji rrit rrezikun për të zhvilluar karies dentar. Megjithëse ushqyerja me gji është e dobishme për shëndetin e fëmijëve, është e nevojshme që të krijojmë sa më shpejt ndërhyrje parandaluese për kariesin dentar. Mekanizmat që shërbejnë si bazë për këtë proces duhet sigurisht që të hetohen më thellë", përfundojnë autorët.