Bronkopneumonia kronike obstruktive. Roli i baktereve gengivale

Një studim i publikuar në mSystems dhe i nënshkruar nga studiuesit e Universitetit Sichuan në Kinë ka hedhur dritë mbi rolin që luajnë qelizat e sistemit imunitar në lidhjen midis bronkopneumonisë kronike obstruktive (BPKO) dhe sëmundjes së mishrave të dhëmbëve, një lidhje komplekse që deri më tani ka mbetur e pastudiuar.

"Periodontiti shkaktohet nga akumulimi i pllakës gengivale dhe është një sëmundje infektive kronike që mund të shoqërohet me patologji të ndryshme përfshirë edhe BPKO-në", thotë bashkautori Boyu Tang, duke shpjeguar se studimet e mëparshme disa të kryera nga grupi i tij, kanë sugjeruar se një rol të rëndësishëm në sëmundjen e gengivave mund ta luajë bakteri oral Porphyromonas gingivalis. Hapi tjetër, i përshkruar në artikullin mSystems, ishte përdorimi i modeleve të miut për të treguar se si P. gingivalis mund të përkeqësojë përparimin e BPKO-së. Duke vepruar kështu, studiuesit treguan se bakteret orale janë në gjendje të nxisin përparimin e BPKO-së duke aktivizuar qelizat γδ T dhe makrofagët M2 të sistemit imunitar. Në veçanti, në indet e mushkërive në BPKO në prani të periodontitit aktivizimi i qelizave γδ T çon në rritjen e shprehjes së interleukinës 17 (IL17) dhe interferonit gama (IFNγ), si dhe në polarizimin e makrofagëve M2.

"Optimizimi i terapisë periodontale dhe frenimi i qelizave T γδ dhe makrofagëve M2 mund të kontribuojë në kontrollin e progresionit të BPKO-së", hipotezojnë autorët, duke shtuar se të dhënat nga mostrat e lëngjeve të lavazhit bronkoalveolar (BAL) ishin në përputhje me rezultatet e marra, të cilat për herë të parë mundën të identifikojnë rolin vendimtar të mekanizmit imunitar γδ T-M2 në ndërmjetësimin e progresionit të BPKO-së të nxitur nga periodontiti.

Rezultatet e këtij studimi përputhen me ato të studimeve të mëparshme në të cilat Tangu dhe kolegët zbuluan se te minjtë e infektuar në rrugë orale me P. gingivalis, bakteret migruan dhe infektuan indin e mushkërive, duke modifikuar ndjeshëm mikrobiotën e traktit respirator.

"Ne arritëm në përfundimin se P. gingivalis mund të aktivizojë qelizat imune duke promovuar aftësinë për të prodhuar citokina të cilat çojnë në përkeqësimin e BPKO-së", tregojnë studiuesit, të cilët do të vazhdojnë të kryejnë studime të mëtejshme mbi subjektet njerëzore për të konfirmuar këtë mekanizëm.

mSystems 2024. Doi: 10.1128/msystems.00572-23
DOI : https://doi.org/10.1128/msystems.00572-23