Efikasiteti i një xheli kundër ndjeshmërisë dentare pas kryerjes së zbardhimit

Zbardhimi dentar është një nga procedurat stomatologjike estetike më të kërkuara nga pacientët për shkak të mospëlqimit të ngjyrës së dhëmbëve. Pavarësisht suksesit të procedurave të zbardhimit...

Zbardhimi dentar është një nga procedurat stomatologjike estetike më të kërkuara nga pacientët për shkak të mospëlqimit të ngjyrës së dhëmbëve. Pavarësisht suksesit të procedurave të zbardhimit dentar, janë vënë re shumë efekte anësore, të tilla si irritimi gingivar dhe ndjeshmëria dentare e shkaktuar nga zbardhimi (TS).

Studimet e literaturës kanë treguar vazhdimisht se 67-100% e pacientëve të cilët i janë nënshtruar zbardhimit dentar në klinikë, referojnë se TS iu është shfaqur në një pikë të caktuar gjatë trajtimit, kryesisht në orët e para pas procedurës.

Kjo ndjeshmëri verifikohet për shkak të peshës së vogël molekulare të peroksidit të hidrogjenit, i cili futet në indet dentare dhe arrin në dhomën pulpare rreth 15 minuta pas aplikimit. Prania e tij në indet e pulpës mund të nxisë procese inflamatore dhe të aktivizojë receptorë aktivë specifikë dhimbjeje, duke shkaktuar shqetësim dhe ndonjëherë, duke e detyruar pacientin të ndërpresë trajtimin.

Për të reduktuar sa më shumë këto efekteve negative, janë propozuar alternativa të ndryshme, ndër të cilat: reduktimi i shpeshtësisë dhe i kohëzgjatjes së aplikimeve të peroksidit të hidrogjenit, ndryshimi i përqendrimit të xhelit zbardhues, ose përdorimi i zbardhuesve me pH neutral ose alkalin.

Gjithashtu, janë propozuar protokolle të tjera, të tilla si ulja e ndjeshmërisë ose rimineralizimi me agjentë të ndryshëm aktivë (nitrati i kaliumit, fosfati i kalciumit, floruri i natriumit), të aplikuar lokalisht në dhëmbë ose të përzierë me agjentin zbardhues.

Përshkrimi i barnave antiinflamatore, i opioideve dhe i barnave kortikosteroide është i shpeshtë pas procedurave të zbardhimit, me qëllim uljen e dhimbjes dhe hipersensibilitetit. Ndër antiinflamatorët më të përdorur, dallohet ibuprofeni. Megjithatë, ibuprofeni përthithet ngadalë, me përqendrime plazmatike që arrijnë maksimumin e tyre vetëm 1 ose 2 orë pas administrimit. Ky fakt mund të shpjegojë pse ibuprofeni e redukton intensitetin e TS së shkaktuar nga zbardhimi, vetëm gjatë fazës së parë post-procedurale.

Me qëllim zgjidhjen e këtij problemi, u eksperimentua kombinimi i ibuprofenit me argininën, aminoacid thelbësor, pasi arginina ndryshon tiparet farmako-kinetike të ibuprofenit, duke i lehtësuar përthithjen e shpejtë dhe duke e bërë më shpejt të biodisponueshëm. Ky kombinim ka rezultuar efikas dhe i shpejtë në kontrollin e dhimbjes post-operatore në shumë procedura stomatologjike.

Një mënyrë tjetër për shpejtimin e përthithjes së agjentëve të uljes së ndjeshmërisë, duke lejuar mekanizmin e tyre të shpejtë, është aplikimi i tyre lokal në sipërfaqen e dhëmbëve.

Si përfundim, aplikimi i xhelit eksperimental kundër ndjeshmërisë, i cili përmban ibuprofen dhe argininë, redukton me efikasitet rrezikun dhe intensitetin e ndjeshmërisë dentare të shkaktuar nga zbardhimi, pa ndikuar në efikasitetin e zbardhimit.