Tashmë vijnë udhëzimet botërore për shëndetin e gingivave

Shuma të mëdha parash do të kursehen çdo vit nga qytetarët. Këto janë vlerësimet e ekspertëve nga Shoqëria italiane e parodontologjisë dhe implantologjisë (SIdP), që bashkë me kolegët evropian, amerikanë dhe aziatik kanë publikuar udhëzimet e para botërore për shëndetin e gingivave. Argumenti është me interes të madh për të gjithë popullsinë sepse mendohet se mbi 20 milionë persona mbi 35 vjeç kanë të bëjnë me gjakosjen ose dhimbjen e gingivave çdo ditë dhe që shpesh nuk e vënë re se gjenden përballë një problemi shumë serioz. Nëse nuk trajtohet në kohë dhe në mënyrën e duhur, në fakt, inflamacioni i gingivave (gingiviti) bëhet një sëmundje e vërtetë (parodontiti) që në formën e saj më të rëndë çon edhe në humbjen e dhëmbëve shpesh me pasoja shumë të rënda në shëndet, por edhe në xhepin e personit. "Kushton më shumë të zëvendësosh një dhëmb të vetëm që është humbur për shkak të parodontitit sesa të kurosh të gjithë gojën e një pacienti te i cili diagnoza është zbuluar prej kohësh" shpjegon Maurizio Tonetti, president i SIdP.
Dëmtimet nga parodontiti nuk ndalojnë vetëm në zonën e gojës.
Është e gabuar të mendojmë se parodontiti është një sëmundje vetëm e gingivave. "Parodontiti shkaktohet nga bakteret e pranishëm në pllakën bakteriale që qëndron te dhëmbët në mungesë të një higjiene orale të mirë" - pohon Tonetti, duke kujtuar se një nga pasojat e shëndetit jo të mirë të gingivave është humbja e dhëmbëve. Dhe të kesh mungesa të dhëmbëve apo dhëmbë "që lëvizin" nuk ndihmon në një dietë të mirë dhe të shëndetshme: "Vitamina C është kryesore për mbajtjen e gingivave të shëndetshme, por kush vuan nga probleme të gingivave me pasojë humbjen e dhëmbëve ka si tendencë që të reduktojë konsumin e frutave dhe zarzavateve që janë shpesh të pasura me këtë substancë, duke zgjedhur ushqime më të buta dhe të pasura me sheqer dhe yndyrna" - qartëson Tonetti.
Por ushqyerja e keqe - që në disa raste vjen nga ushqimi i keq - nuk është pasoja e vetme nga parodontiti. Ekspertët e sektorit e dinë mirë që pas një analize të kujdesshme të të dhënave shkencore të disponueshme, kanë publikuar një dokument ("Manifestim") në të cilin dalin në pah lidhje të panumërta midis shëndetit të keq të gingivave dhe sëmundjeve që nuk lidhen me gojën.
"Parodontiti është një sëmundje inflamatore kronike që lidhet me faktorë të shumtë me pasoja mundësisht negative në brendësi të organizmit" - shpjegojnë autorët e dokumentit, duke cituar midis sëmundjeve të mundshme "të nxitura" ose "të mbështetura" nga problemet e gingivave: diabetin, patologjitë kardiovaskulare, patologjitë e aparatit të frymëmarrjes, patologjitë e veshkave dhe iktusin. Shkaku kryesor do të ishin bakteret e pranishme në gojë kur personi ka parodontit dhe që mund të kalojë nëpërmjet qarkullimit të gjakut duke shkuar dhe shpesh duke i dëmtuar organet e tjera.

Gingivat më të shëndetshme në 10 lëvizje
Atëherë çfarë duhet bërë? "Hapi i parë për të shmangur të gjitha pasojat negative të parodontitit është diagnoza e hershme" - shpjegon Tonetti, duke kujtuar gabimin që pothuajse të gjithë bëjnë: duke ju drejtuar dentistit vetëm kur fillojnë të bien dhëmbët. Dhe më pas shton: "Në ditët e sotme ekziston një test i thjeshtë i quajtur Psr (Ekzaminim dhe Regjistrim i shëndetit parodontal) që lejon të kuptohet në mënyrë të shpejtë dhe pa dhimbje kur gingivat janë të skuqura apo të acaruara." Përveç kësaj mbajtja e gingivave të shëndetshme nuk është shumë e vështirë, sipas ekspertëve që propozojnë dekalogun e vërtetë "shpëto gingivat":
1. Të shmanget duhan pirja
2. Të zgjidhet një dietë e pasur me fruta dhe zarzavate për të marrë një sasi të mirë të vitaminës C.
3. Të paktën dy herë në vit duhet të kryhen vizitat te dentisti dhe një seancë te higjenisti
4. Të kryhet testi i Ekzaminimit dhe Regjistrimit të shëndetit parodontal (Psr) gjatë vizitave te dentisti.
5. Të këshillohet larja e dhëmbëve të paktën dy herë në ditë për të paktën 4 minuta në rastin e inflamacionit të gingivave.
6. Të këshillohet përdorimi i furçës elektrike në vend të asaj manuale.
7. Të zgjidhen pasta dhëmbësh specifike për dhëmbë dhe gingivat të ndjeshme.
8. Të përdoren furçat ndërdhëmbore në vend të fillit dentar.
9. Të këshillohet një shpëlarës goje i përshtatshëm dhe të shpjegohet mënyra e përdorimit.
10. Të këshillohet vizita e menjëhershme te dentisti në rast se kemi gingivat të skuqura, që gjakosen ose të tërhequra

Përktheu: Valbona Spahia