Menaxhimi i dhimbjes në pulpitin irreversibël: mjekimi paraprak me analgjezikë për të fuqizuar efektin e anestezisë

Menaxhimi i dhimbjes është një nga problemet primare që duhet të përballet stomatologu. Të kryesh trajtime stomatologjike pa ndier dhimbje është dëshira kryesore e pacientit, kryesorja dhe në disa raste edhe e vetmja, kriter ky që kushtëzon kënaqësinë e pacientit në krahasim me punën e dentistit apo të klinikës. Kontrolli i dhimbjes shpesh rezulton i vështirë në rastet, për shembull të pulpitit irreversibël, ku bëhet e nevojshme përshtatja e masave që rrisin mundësinë e anestezisë për të qenë e suksesshme.

Një artikull i publikuar në JADA maj 2017 që paraqet dhe komenton një rishikim sistematik të shfaqur në Clin Oral Investig në janar, dëshmon se si një mjekim paraprak me analgjezikë si ibuprofeni apo axicam rrisin nivelin e anestezisë te molarët inferiorë me pulpit irreversibël.

Në këtë rishikim autorët kanë kërkuar nëpërmjet 5 bankave të të dhënave elektronike (Cochrane Databases for Systematic Review, Pub Med, Science Direct, Scopus, dhe Google Scholar, deri në mars 2015) studime klinike të randomizuara rreth argumentit. Nga të gjithë studimet e gjetura janë përfshirë 16 në rishikim, aq sa përshtateshin me kriteret e përfshirjes. Kështu janë regjistruar 1900 pjesëmarrës me moshë nga 23 në 39 vjeç. Janë administruar kombinime të ndryshme analgjezikësh dhe në shumë studime është hasur një heterogjenitet i lartë. Analgjezikët janë administruar si dozë e vetme orale me intervale të ndryshme kohe sipas studimit që mund të ishin 30, 45 dhe 60 minuta para ndërhyrjes.

Analgjezikët e administruar në studime të ndryshme dhe të përfshirë në rishikim kanë qenë: iburpofeni, indometacina, ketorolac, meloxicam, acetaminophen, diclofenac potas, aceclofenac, iornoxicam, piroxicam, etodolac dhe paracetamol. Dozimi i ibuprofenit varion nga 200 në 800 mg, ai i acetaminophen-it nga 325 në 1000 mg. Katër studime krahasonin bashkë administrimin e analgjezikëve (NSAID dhe acetaminophen ose dy NDSAID).

11 studime kanë vlerësuar FANS si monoterapi. Në tre studime pacientët kanë marrë vetëm acetaminophen dhe në dy studime pacientët kanë marrë administrimin e njëkohshëm të acetaminophen dhe opioide.

Anestetikët lokalë të përdorur kanë qenë mepivakaina në 1 studim, artikaina në një tjetër dhe lidokaina në 14 (pra më i përdoruri).

Nga rezultatet e rishikimit kemi mundur të konstatojmë se mesatarisht te pjesëmarrësit që kanë marrë një mjekim paraprak me analgjezikë oralë para ndërhyrjes, mundësia për të përftuar një anestezi të suksesshme ishte 3,33 herë më e madhe krahasuar me atë të pjesëmarrësve që kanë marrë një placebo.

Ndër ata që kanë marrë vetëm ibuprofen është vërejtur një probabilitet 2,27 herë më i lartë për të pasur një anestezi të suksesshme krahasuar me pjesëmarrësit që kanë marrë placebo. Administrimi i oxicam si analgjezik gjithashtu ka rritur probabilitetin për të përftuar sukses në anestezi 10 herë më shumë se placebo.

Acetaminophen nuk ka dhënë rezutlate më të larta krahasuar me placebon.

Pavarësisht kufizimeve të këtij rishikimi që mund të jenë të përbëra nga një heterogjenitet dhe nga numri i reduktuar i studimeve të përfshira dhe i kampioneve të konsideruara nga rezultatet e përftuara të metanalizës, mund të afirmojmë se një strategji për të përmirësuar suksesin anestetik në rastet e pulpitit irreversibël me ngarkesë të molarëve inferiorë, është që të adoptojmë si protokoll një mjekim paraprak me analgjezikë. Për të maksimizuar efektin e anestezisë dhe të mos ndërhyjmë në komplikimet me karakter algjik gjatë trajtimit kanalar është e këshillueshme të përshkruajmë disa lloje të NSAIDs (indometacinë, meloxicam dhe prioxicam dhe Diclofenac potas), ose të vijojmë me administrimin njëkohësisht të acetaminophen dhe opioide. Në bazë të rezultateve të këtij rishikimi artikaina duket se është anestetiku lokal më efikas në këto rrethana.

Nën kujdesin e: Lara Figini, Koordinatore Shkencore e Odontoiatria33

Për më tepër:
• Brignardello-Petersen R., Preoperative oral ibuprofen and oxicam analgesics increase the rate of successful anesthesia of mandibular molars with irreversible pulpitis, J Am Dent Assoc. 2017 May;148(5)
• Shirvani A, Shamszadeh S, Eghbal MJ, Marvasti LA, Asgary S. Effect of preoperative oral analgesics on pulpal anesthesia in patients with irreversible pulpitis: a systematic review and meta-analysis. Clin Oral Investig. 2017;21(1):43-52.

Përktheu: Erjola Taga