Metanfetamina: cilat janë efektet në zgavrën e gojës

Në Shtetet e Bashkuara konsumi i metanfetaminës, një lëndë narkotike me efekt eksitues ka vënë në alarm Shoqatën Dentare Amerikane: pasi numri i personave që e përdorin është në rritje dhe ndër efektet më të dukshme të substancës është përkeqësimi i shpejtë i shëndetit të zgavrës së gojës. Shoqata ka vendosur të informojë stomatologët që të jenë në gjendje të dallojnë dëmet që lidhen me abuzimin e metanfetaminës dhe të ndërhyjnë kur është akoma e mundur që të ruajmë kapacitetin mastikator. Këto udhëzime të disponueshme në sitin e shoqatës mund të jenë të dobishme për të gjithë stomatologët.

Metanfetamina që mund të merret në rrugë orale ose të thithet nëpërmjet hundës, ose të tymoset, reagon kryesisht në prodhimin e adrenalinës, noradrenalinës dhe dopaminës; ndër efektet e saj janë rritja e presionit të gjakut dhe e rrahjeve kardiake, përshpejtimi i frymëmarrjes dhe një ulje e salivacionit. Kjo është karakteristika e fundit që ndikon kryesisht në shëndetin oral: mungesa e pështymës për periudha të zgjatura lë smaltin dentar pa mbrojtje kundër mikroorganizmave dhe substancave acide të prodhuara apo të futura në zgavrën e gojës. Të dhënat amerikane tregojnë se ata që përdorin metanfetaminë janë dhe konsumatorë të mëdhenj të pijeve të ëmbla dhe të gazuara, me të cilat kërkojnë që të shuajnë etjen e madhe shkaktuar nga mungesa e pështymës; dy kushtet që verifikohen njëkohësisht, pra mungesa e pështymës dhe prania e vazhduar e substancave acide në zgavrën e gojës vënë në lëvizje një proces zhvillimi të lezioneve karioze shumë më të shpejtë nga sa vihet re zakonisht.

"Kariesi që lidhet me konsumin e metanfetaminës ka karakteristika të veçanta dhe të dallueshme, të ngjashme me ato që hasen në pacientë që i janë nënshtruar terapisë me rreze në kokë dhe qafë: lezionet karioze përqendrohen fillimisht gjatë linjës gingivale më pas zhvillohen shumë shpejt mbi të gjitha në sipërfaqen vestibulare të dhëmbëve," shpjegon Charles Tatlock, docent pranë Departamentit të kirurgjisë orale të University of New Mexico në Shtetet e Bashkuara, që vitin e kaluar i është dedikuar studimit të simptomave që derivojnë nga përdorimi i metanfetaminës; "në smalt formohet një cipë me ngjyrë të verdhë pothuajse e pazakontë nëse krahasohet me pllakën e zakonshme bakteriale."

"Ndër efektet e përdorimit të metanfetaminës janë rritja e lëvizjeve të pavullnetshme dhe reduktimi i ndjesisë së dhimbjes dhe këto kontribuojnë në përcaktimin e karakteristikave të veçanta të çrregullimeve orale. Bruksizmi dhe gërryerja e dhëmbëve shkaktuar nga substancat, konsumojnë në veçanti kaninët dhe premolarët dhe i çojnë lehtësisht drejt thyerjes pasi janë të dobësuar tashmë nga lezionet karioze; përveç kësaj pacienti që përdor metanfetaminë mund të dallohet dhe ndihmohet falë dhe faktit se substanca redukton ndjesinë e dhimbjes," thotë në fund docenti; "këto pacientë, në fakt shpesh nuk ankohen për dhimbje edhe pse paraqesin lezione të thella por thonë se janë paraqitur në klinikën stomatologjike për arsye estetike apo në rastet më të rënda për shkak të reduktimit të kapacitetit mastikator".

Burimi: Odontoiatria33

Përktheu: Erjola Taga