Si të parandalojmë risqet në rrugët e frymëmarrjes për dentistin dhe asistentin e tij

Norberto Maccagno

Lajmi që Centers for Disease and Prevention në Shtetet e Bashkuara po studiojnë një grup për vdekje të dyshuara për fibrozën pulmonare idiopatike që janë zbuluar ndërmjet dentistëve dhe profesionistëve dentarë, ka nxitur vëmendjen e lexuesve për sigurinë në klinikat dentare përsa i përket shëndetit të profesionistëve.
"Nuk më duket rasti i përshtatshëm për të krijuar alarmizma të kota", komenton Alberto Libero, sekretar i Sindikatës ANDI, për Odontoiatria33. "Duke u nisur nga ajo që shkruhej në artikullin e mëparshëm, edhe organizmi i kontrollit amerikan ka pranuar se bëhet fjalë për raste që prekin persona të moshuar që ushtronin një stomatologji totalisht të ndryshme nga ajo e sotmja." "Në ditët e sotme falë teknologjive që kemi në dispozicion dhe falë një kulture drejt tutelës së shëndetit tonë dhe të shëndetit të bashkëpunëtorëve tanë, konkretisht nuk ekzistojnë risqe."

Përsa i përket normave që rregullojnë sigurinë e vendeve të punës nuk ka indikacione specifike përveç asaj që në rastin e risqeve të mundshme këto duhet të anulohen dhe në rastin kur nuk mund të eliminohen punonjësi duhet të pajiset me një pajisje personale mbrojtëse (PPE) ose "çdo pajisje që përfshin veshjen dhe mbajtjen nga punëdhënësi për ta mbrojtur punonjësin nga një ose më shumë risqe që mund të kërcënojnë sigurinë ose shëndetin gjatë punës, si dhe çdo veshje ose aksesor që është përshtatur për një qëllim të tillë."
Në temën e mbrojtjeve individuale që duhen përdorur gjatë kurave të pacientit ANDI këshillon veshjen e dorezave kirurgjikale, syzeve me xham mbrojtës si dhe duhet të përdoret aspirimi me shpejtësi të lartë në mënyrë të përshtatshme gjatë kryerjes së trajtimit me qëllim që të limitohet në maksimum shpërbërja e avujve në ambientin përreth.

"Parandalimi i riskut biologjik vjen edhe përmes përdorimit të maskave, për të mbajtur kontaminimin nga pluhurat dhe stërkalat.", shpjegon Roberta Pegoraro konsulente e menaxhimit stomatologjik. "Maskat mbrojtëse mund t'i referohen filtrave të tipit FFP1 (për mbrojtjen nga pluhurat aerosol me bazë ujore me diametër më të vogël se 2 mikron), ose FFP2 (për mbrojtjen nga pluhurat me toksicitet mesatar me një aftësi të mirë filtrimit), për mbrojtjen nga pjesëzat e kontaminuara që janë më të vogla se 2 mikron me efikasitet të shkëlqyer filtrimi. Përdoret edhe referimi për filtrat FFP3."
Përsa i përket dorezave ekspertja këshillon verifikimin e alergjive të mundshme përpara se të zgjidhet tipologjia që do përdoret përveç masës së përshtatshme. "Stomatologu dhe asistenti i tij kalojnë shumë orë të ditës duke veshur dorezat dhe prandaj ato duhet të lejojnë mbajtjen e ndjeshmërisë së gishtave por nuk duhet as që të krijojnë probleme në lëkurë. Në raste të veçanta të ndjeshmërisë, këshillohet përdorimi i dorezave të pambukut që vishen nën to", përfundon ajo.

Përktheu: Valbona Spahia