Sëmundja e Parkinsonit dhe funksione motore të çrregulluara të gjuhës

Është ekzaminuar disfagia pasuese

Nga Figini Lara

Në sëmundjen e Parkinsonit (PD) disfagia shfaqet me progresionin e sëmundjes. Ashpërsia e disfagisë nuk është gjithmonë e lidhur me sëmundjen sipas klasifikimit të Hoehn dhe Yahr (H&Y).

Një vlerësim i thjeshtë dhe i kuantifikuar i gëlltitjes për diagnozën e hershme të disfagisë është i dobishëm për të njohur efektin terapeutik të barnave dhe të rehabilitimit.

Presioni i kontaktit midis qiellzës dhe gjuhës jep kontributin maksimal në transferimin e bolus në fazën orale të gëlltitjes. Megjithëse disfagia është një problem potencialisht vdekjeprurës te pacientët me sëmundje të Parkinsonit, fiziopatologjia e disfagisë orofaringeale duhet të jetë akoma e përfshirë deri në fund.

Tipologjia e kërkimit dhe mënyra e analizimit

Në një studim të kryer pranë Spitalit Universitar të Osaka dhe të publikuar në Journal of Oral Rehabilitation, qershor 2018, hetohet funksioni motor i gjuhës gjatë gëlltitjes në marrëdhënie me ashpërsinë e sëmundjes së Parkinsonit (PD).

30 pacientë me PD (14 meshkuj dhe 16 femra; mosha mesatare 69.4 vjeç), stadi II-IV i PD në bazë të klasifikimit të Hoehn dhe Yahr, janë përfshirë në studim. Presioni i gjuhës në qiellzën e fortë është matur gjatë gëlltitjes së 5 ml ujë duke përdorur një fletë sensori me 5 pika matje.

Vlera maksimale e presionit të gjuhës në secilën pikë të matjes gjatë gëlltitjes është krahasuar midis pacientëve me PD dhe individëve të shëndetshëm të kontrollit. Një vlerësim subjektiv i keqfunksionimit orofaringeal është kryer gjithashtu duke përdorur pyetësorin Swallowing Distrubance Questionnaire.

Rezultate
Presioni maksimal i gjuhës në secilën pikë të matjes ka rezultuar në mënyrë domethënëse më i ulët te pacientët me sëmundjen e Parkinsonit (PD) në krahasim me kontrollet e shëndetshëm. Gjithashtu presioni maksimal i gjuhës ka qenë në mënyrë domethënëse më i ulët te pacientët me PD me disfagi në krahasim me individët me PD pa disfagi.

Humbja e prodhimit të presionit të gjuhës drejt paretit anterior të qiellzës së fortë ka rezultuar gjithashtu fortësisht e lidhur me disfaginë në fazën faringeale.

Konkluzione
Rezultatet e këtij studimi sugjerojnë se te pacientët me sëmundjen e Parkinsonit me disfagi kanë një tension maksimal të zvogëluar të presionit të gjuhës, një rreze të lëvizjes të reduktuar dhe një aftësi motore të gjuhës që manifestohet si skema anormale duke çuar në një gëlltitje të fragmentuar.

Implikime klinike
Rezultatet sugjerojnë se matja e presionit të gjuhës në qiellzën e fortë gjatë gëlltitjes mund të jetë e dobishme për identifikimin e hershëm dhe sasior të paaftësisë motore të gjuhës gjatë gëlltitjes te pacientët e prekur nga sëmundja e Parkinsonit.

Për më tepër:
Minagi Y, Ono T, Hori K, Fujiwara S, Tokuda Y, Murakami K, Maeda Y, Sakoda S, Yokoe M, Mihara M, Mochizuki H. Relationships between dysphagia and tongue pressure during swallowing in Parkinson's disease patients. J Oral Rehabil 2018 Jun;45(6):459-66.

Përktheu: Erjola Taga