Si të parashikojmë riskun e progresit të lezioneve orale pre-kanceroze?

Një studim kanadez paraqet një test të ri të bazuar në FCE

Nga Figini Lara

Kanceri oral (Oral Cancer) ka një impakt në të gjithë botën të barabartë me 274.000 raste të reja dhe 145.000 vdekje çdo vit. Shkalla e mbijetesës mbi 5 vjet rezulton të jetë deri tani e ulët dhe nuk është hasur asnjë përmirësim domethënës i prognozës në 50 vitet e fundit.

Mënyrat aktuale të trajtimit të OC shpesh mund të jenë invazive dhe mund të ndikojnë ndjeshëm në cilësinë e jetës së pacientëve të trajtuar, me rezultatin e funksioneve të çrregulluara dhe shpërfytyrimeve të rënda në disa raste. Kështu në studimin aktual zgjidhja më e mirë mbetet akoma ndërhyrja e hershme në lezionet premalinje orale (Oral Premalignant Lesions) me risk akoma më të lartë.

Megjithatë nuk janë akoma të disponueshëm tregues objektivë dhe të zbatueshëm për të parashikuar riskun e progresit drejt kancerit, sidomos për ato lezione që kanë një displazi epiteliale histologjikisht të lehtë apo të moderuar (pra, lezione me shkallë të ulët [Low Grade Lesions]).

Aktualisht modeli i testit që është përdorur dhe vlerësuar më së shumti për vlerësimin e riskut të progresionit kundrejt kancerit të lezioneve premalinje është ai i quajtur P-GE, që përdor radioizotopi në xhel poliakrilamidi, por që mund të jenë të dëmshëm. Gjithashtu është një test i kushtueshëm dhe me shpenzime për sa i përket kohës, prandaj është i vështirë të implementohet në diagnostikimin në laborator për përdorim klinik.

Një qasje tjetër e quajtur elektroforezë kapilare fluoreshente (Fluorescence Capillary Electrophoresis), që përdor primer me etiketë fluoreshente dhe elektroforezë kapilare - dhe që përdoret zakonisht në laboratorët e patologjisë për të shtresëzuar llojet dhe opsionet e trajtimit për tumoret cerebrale malinje - mund të futet dhe përdoret si alternativë ndaj P-GE, potencialisht duke kaluar mungesat e këtij të fundit duke qenë i adaptueshëm më së shumti për përdorim klinik.

Tipologjia e kërkimit dhe mënyra e analizimit
Në një studim të publikuar në Oral Surg oral Med Oral Pathol Oral Radiol të Korrikut 2018, studiohet besueshmëria e një testi që përdor elekroforezën kapilare të fluoreshencës (FCE) për të vlerësuar humbjen e heterozigozitetit (Loss Of Heterozygosity, që përfaqëson një indeks gjenetik të transformimit malinj) të lezioneve me displazi epiteliale histologjikisht të lehtë ose të moderuar (LGL) për të identifikuar ato me riskun më të lartë të progresionit kundrejt kancerit oral.

Autorët e studimit kanë krahasuar rezultatet me FCE të 52 kampioneve me margo kirurgjikale me ato ekzistues që vijnë nga qasja me testin P-GE të vlerësuar paraprakisht.

Rezultate
Nga të dhënat e përftuara nga ky studim është zbuluar një marrëveshje e LOH-P-GE dhe LOH-FCE me një mesatare prej 82,3% (76,8-87,8) me interval besimi 95% [CI] 2,6-17,6) dhe me specifikim prej 98,4%.

Konkluzione
Autorët kanë zhvilluar një test objektiv të bazuar në elektroforezën kapilare fluoreshente (FCE), duke përdorur LOH për të shtresëzuar riskun e LGL që duket se është i besueshëm dhe mund të përdoret në fushën klinike për t'i mundësuar mjekëve informacione të mëtejshme që drejtojnë menaxhimin e këtyre lezioneve. Janë të nevojshme sigurisht studime të mëtejshme të ngjashme për të konfirmuar këto rezultate.

Implikime klinike
Aktualisht nuk ekziston një qasje standarde për të vlerësuar riskun e degjenerimit malinj të lezioneve orale prekanceroze me displazi të lehtë ose të moderuar. Testi i prezantuar nga autorët mund të na furnizojë me informacione të mëtejshme molekulare që tregojnë riskun për progresionin malinj, që mund të shërbejnë si guidë e rëndësishme për menaxhimin klinik të lezioneve prekanceroze.

Për më tepër:
Kelly YP Liu, David XJ Lu, Yi-Shing L Cheng, Klieb H, Ng S, McNeil K, Karsan A, Poh CF. An actionable test using loss of heterozygosity in identifying high-risk oral premalignant lesions. Oral Surg Oral Med Oral Pathol Oral Radiol 2018;126(1):54-62.

Përktheu: Erjola Taga