Mukoziti oral te fëmijët gjatë kimioterapisë: një kërkim italian identifikon "COMEDY"

Ndërkohë që diagnoza e parakohshme dhe progreset në terapinë onkologjike për fëmijët vazhdojnë të përmirësohen, komplikacionet orale mbeten një shkak i rëndësishëm i lëvizshmërisë dhe vdekjes së mundshme. Pasi kanë vizituar, kontrolluar dhe trajtuar zgavrën e gojës së mijëra fëmijëve me leucemi ose tumore solide për më shumë se 25 vjet, profesoreshat Elena Bardellini dhe Alessandra Majorana të Universitetit të Studimeve në Brescia kanë përkufizuar një aspekt të ri të mukozitit oral gjatë kimioterapisë.

Mukoziti oral (MO) është një nga komplikacionet me efektet më të mëdha negative te fëmijët që marrin terapinë antitumorale. Progreset e fundit në kuptueshmërinë e mekanizmit të tij patologjik indikojnë që MO është pasojë e një serie ngjarjesh biologjike dinamike dhe interaktive që përfshijnë epitelët dhe nënmukozën në përgjigje ndaj agjentëve stomatotoksikë. Një seri faktorësh si regjimet e trajtimit, kohëzgjatja e trajtimit, intensiteti i dozës, cilësia dhe sasia e pështymës influencojnë riskun individual të mukozitit.

"Megjithatë mukoziti oral në disa raste mund të manifestohet edhe në mungesë të toksicitetit farmakologjik, pra në kushte stresi psikologjik që lidhet me refluksin gastro-ezofageal joeroziv", - thotë profesoreshë Elena Bardellini.

Kërkimi tregon që pjesa më e madhe e pacientëve me refluks gastro-ezofageal joeroziv shpesh vuajnë edhe nga ankthi, depresioni ose çrregullime të tjera emotive. Në gjendjen aktuale, etiologjia dhe patogjeneza e këtij refluksi mbeten pak të qarta. Fëmijët që i nënshtrohen kimioterapisë ndonjëherë manifestojnë dhimbje faringeale dhe vështirësi në gëlltitje (disfagia).

Ashtu siç sjellin dhe në publikimin e fundit të grupit të Universitetit të Brescia në Journal of Paediatric Hematology Oncology, këto fëmijë paraqesin një ndryshim specifik të mukozës orale me një aspekt opaleshent të përzier, që shkakton dhimbje dhe kufizime në hapjen e gojës. Ky aspekt karakteristik varet nga një reagim mbrojtës në veprimin e dhimbshëm të gëlltitjes, që i bën që të shtrëngojnë dhëmbët gjatë gjithë ditës. Shtrëngimi i zgjatur i dhëmbëve shkakton edemë të mukozës orale, me hiperkeratozë. Gjurmët e dhëmbëve janë të dukshme në mukozën orale dhe te gjuha, që krijon çarje.

"Gjatë ekzaminimit oral të fëmijëve të shtruar në repartin e hemato-onkologjisë pediatrike të ASST-Spedali Civili di Brescia", - vijon profesoreshë Elena Bardellini - "këto pacientë të veçantë mbyllin sytë dhe mbledhin shpatullat, qoftë si reagim mbrojtës ndaj dhimbjes faringeale qoftë si refuzim psikologjik ndaj shtrimit në spital. Të gjithë këta elemente konfigurojnë një entitet preciz të akronimit "COMEDY" (Clenching Oral Mucositis Eyes Dysphagia)."

"Njohja e modelit COMEDY", - afirmon profesoreshë Alessandra Majorana - "te fëmijët që i nënshtrohen kimioterapisë do t'i vijë në ndihmë drejtimit të trajtimit drejt një kombinimi të terapisë konvencionale për refluksin dhe psikoterapinë për të lehtësuar depresionin dhe ankthin, të shoqëruar nga përdorimi i agjentëve të veshjes së mukozës orale dhe barnave anti-inflamatore për të reduktuar dhimbjen orale. Në fund njohja e këtij modeli të mukozitit dhe të karakteristikave të tij do të çojë në përmirësimin e menaxhimit të fëmijës gjatë kimioterapisë duke përmirësuar cilësinë e jetës së vetë fëmijës."

Përktheu: Valbona Spahia