Nekroza mandibulare nga marrja e bifosfonateve

Te pacientët me tumor prostatik metastatik osteonekroza mandibulare lidhet me marrjen e bifosfonateve (Bp-On), një efekt anësor ky që është përshkruar për herë të parë në 2003 që mund të jetë një problem i nënvlerësuar. Këtë kanë supozuar kërkuesit e Universitetit Johannes Gutenberg në Magonza (Gjermani), autorë të një studimi që ka për qëllim vlerësimin e saktë të incidencës së Bp-On në një grup pacientësh me tumor prostatik me metastaza kockore që janë trajtuar me bifosfonate. Kërkimi i publikuar në European urology, ka përfshirë 43 pacientë që janë trajtuar për një vit dhe i janë nënshtruar kontrolleve të rregullta për osteonekrozën, difektet e mukozës, inflamacionin dhe higjienën orale.

Tetë prej tyre, pra 18,6% ka zhvilluar osteonekrozë mandibulare për shkak të bifosfonateve. Të gjithë pacientët kishin marrë zoledronate të paktën 14 herë, dy ishin trajtuar me ibadronate dhe një kishte përdorur pamidronate përpara se të kalonte te zoledronate, bifosfonati më të fuqishëm që përmban edhe azot. Të gjithë kishin pasur një ekstraksion dentar ose vuanin nga dhimbja e dhëmbëve. Në krahasim me punimet e tjera të publikuara deri më sot, ky studim tregon një incidencë relativisht të lartë të Bp-On dhe kjo mund të jetë për shkak të faktit që bëhet fjalë për një hetim perspektiv që parashikon kontrolle orale të kujdesshme.

"Mund të kundërshtohet që efekti kritik i dozave të larta të bifosfonateve nuk është treguar qartë, sepse mungon një grup kontrolli"- komentojnë autorët. "Por edhe pse nuk është statistikisht i rëndësishëm kemi vënë re një akumulim të barit më të lartë te pacientët që kanë zhvilluar osteonekrozë manidibulare në krahasim me të tjerët."

Përktheu: Valbona Spahia