Hemoglobina e glikuar gingivale: skrinimi i diabetit bëhet edhe te stomatologu

Në SHBA është vlerësuar se rreth tetë milionë persona kanë diabet të padiagnostikuar dhe shumë diabetikë kanë një kontroll të dobët glicemik. "Duke qenë se çdo vit shumë amerikanë shkojnë te stomatologu por jo te mjeku i familjes, klinika stomatologjike mund të jetë vendi i përshtatshëm për skrinimin e diabetit dhe për verifikimin e kontrollit metabolik te të sëmurët në risk" - shpjegon Sheila Strauss, profesoreshë e asociuar e infermierisë në New York University Colleges of Nursing and Dentistry si edhe koordinatore e një studimi të publikuar në American Journal of Public Health, nga i cili del se vlerat e hemoglobinës së glikuar (HbA1c) që merren nga gjaku gingival janë pothuajse identike me ato që merren nga gjaku i kapilarëve në mollëzat e gishtave.

"Shkalla e lidhjes ndërmjet dy kampionëve ka rezultuar 99,1% në 408 pjesëmarrës të studimit" vijon kërkuesja, duke kujtuar se HbA1c është këshilluar nga American Diabetes Association (ADA) për diagnozën dhe kontrollin metabolik të diabetit melit. "Nën dritën e këtyre rezultateve vizita stomatologjike mund të jetë një rast i dobishëm për të identifikuar ato që kanë nevojë për teste të tjera diagnostikues, duke kontribuar në zbulimin e një diabeti të padiagnostikuar" - shton Strauss, duke theksuar se këto të dhëna vijnë pas rezultateve pozitive të një studimi të parë pilot të projektuar për të vlerësuar realizueshmërinë dhe pranimin për pacientët dhe stomatologët që të përdorin gjakun oral për skrinimin gjatë një ekzaminimi normal stomatologjik. "Të gjithë personat në risk për diabet me moshë të paktën 45 vjeç te të cilët sëmundja nuk është diagnostikuar mund të përfitojnë nga skrinimi i bërë te stomatologu me gjakun gingival" - përfundon autorja e artikullit, duke përmbyllur se matja e HbA1c gingivale mund të shërbejë edhe për monitorimin e kontrollit glicemik ndërmjet të sëmurëve të diagnostikuar tashmë, duke zbuluar një dobishmëri të madhe në shëndetësinë publike për të përmirësuar gjendjen e shëndetit të popullsisë.

Përktheu: Valbona Spahia