Cili antibiotik duhet administruar për ngritjen e sinusit të nofullës dhe komplikacionet infektive?

Nga Lara Figini

Ndërhyrja për ngritjen e sinusit të nofullës ka treguar se është një metodikë e sigurt dhe efikase për të krijuar dhe optimizuar formimin e kockës për pozicionimin e implanteve në rastet e sinuseve pneumatike. Megjithatë, ndonjëherë mund të sjellë komplikacione intra dhe post-operative, si infeksionet, që mund të ndikojnë rezultatet kirurgjikale.

Infeksioni mund të verifikohet në dy mënyra: infeksioni i pjesës së vendosur nën membranën sinusale që është ngritur dhe infeksioni i vetë sinusit. Në rastet kur shfaqet infeksioni, është i nevojshëm administrimi i antibiotikëve.

Por çfarë antibiotikësh duhen dhënë në këto raste? Një antibiogramë e florës bakteriale të pranishme në sinusin e nofullës do të ofrojë informacionet specifike ku duhet të bazohet në mënyrë efikase trajtimi antibiotik.

Tipologjia e kërkimit dhe modaliteti i analizës
Në një studim të publikuar në Clinical Oral Implants Research në nëntor 2018, autorët kanë përdorur një antibiogramë për të përcaktuar antibiotikun e zgjedhur për trajtimin e infeksioneve te pacientët që i nënshtrohen kirurgjisë së ngritjes së sinusit të nofullës.

Një total prej 174 pacientësh (90 gra dhe 84 burra) me moshë mesatare 55,92 vjeç i janë nënshtruar 227 ndërhyrjeve të ngritjes së sinusit. Pas ngritjes së membranës autorët kanë grumbulluar një kampion bakterial nga dyshemeja e sinusit të nofullës me një pambuk.

Kampioni i marrë është vendosur në agar gjaku dhe në agar çokollatë për kulturë dhe është inkubuar për 48 orë në 37°C. Më pas, janë kryer analizat mikrobiologjike. Antibiogramat janë kryer për secilën nga kulturat pozitive për të identifikuar antibiotikun më të ndjeshëm.

Antibiotikët janë grupuar sipas mekanizmave të tyre të veprimit në:
• beta-laktamikë (penicilina);
• beta-laktamikë (cefalosporina);
• makrolidët;
• kinolonet;
• fosfomicina;
• aminoglikozidet ose trimetoprim-sulfametosazoli.

Rezultate
Nga 227 kultura kanë rezultuar baktero-pozitive 18,1%. Nga të cilat 45% e kolonive bakteriale të pranishme ishte e llojit Streptokok, pjesa më e madhe e të cilëve i përkiste grupit Streptococcus viridans (61,1%). Bakteret e analizuara tregonin një rezistencë më të madhe ndaj makrolideve dhe një ndjeshmëri më të madhe ndaj penicilinës, cefalosporinave dhe ciprofloksacinës.

Antibiotikët që kanë treguar efikasitetin më të madh kanë rezultuar të jenë sipas rendit të mëposhtëm:
1. ampicilinë;
2. amoksicilinë-acid klavulanik;
3. ciprofloksacinë.

Konkluzione
Në bazë të antibiogramave të kryera në këtë studim, antibiotikët me efikasitet në të madh kundër komplikacioneve të mundshme infektive në ndërhyrjet e ngritjes së sinusit të nofullës janë si në vijim: ampicilinë, amoksicilinë-acid klavulanik dhe ciprofloksacinë.

Implikimet klinike
Klinikisht, antibiogramat kanë rezultuar të dobishme sepse lejojnë dhënien e antibiotikëve specifikë për të zgjidhur infeksionet e mundshme post-operative të sinusit të nofullës.

Për më tepër:
Carreño Carreño J, Gómez-Moreno G, Aguilar-Salvatierra A, Martínez Corriá R, Menéndez López-Mateos ML, Menéndez-Núñez M. The antibiotic of choice determined by antibiogram in maxillary sinus elevation surgery: A clinical study. Clin. Oral Impl Res 2018;29:1070-6.

Përktheu: Valbona Spahia