Diabeti dhe periodontiti: një sinergji e rrezikshme

Paola Gregori

Pacientët e prekur nga diabeti janë 2 deri në 3 herë më shumë në risk për një sëmundje periodontale infektive, veçanërisht nëse glicemia e tyre nuk është nën kontroll. Anasjelltas periodontiti infektiv mund të japë një përkeqësim të glicemisë dhe një risk më të madh të vdekjes për shkaqe kardiovaskulare dhe për sëmundjet e veshkave. Pra kjo patologji e gojës mund të konsiderohet "spiune" e diabetit dhe tek individët e sëmurë mund të përcaktojë një përkeqësim në kuadrin sistemik.

"Sëmundja periodontale është një komplikim i diabetit dhe ka prova në literaturë që e tregojnë që ka efekte anësore mbi kontrollin e diabetit, mbi zhvillimin e komplikimeve dhe mbi përkeqësimin e diabetit: mjaft të mendohet që prania njëkohësisht e dy sëmundjeve kronike te një pacient dyfishon mundësitë e vdekjes nga sëmundjet kardiovaskulare," - shpjegon Robert J. Genco, profesor i biologjisë orale dhe mikrobiologjisë, Universiteti Shtetëror i New York në Buffalo.

"Ekziston në fakt një lidhje mes patologjisë metabolike me atë të gojës: në një popullsi diabetike me periodontit 37% e pacientëve e shohin sëmundjen e tyre metabolike duke u përkeqësuar, përkundrejt vetëm 11% të atyre që e kishin gojën të shëndetshme."
Në origjinën e kësaj marrëdhënie ndërmjet dy patologjive bakteret Gram-negative janë përgjegjëse për infeksionin oral.
Këto çojnë në një rritje të rezistencës së insulinës, e cila nga ana e saj është shkak për një përkeqësim të kontrollit glicemik dhe anasjelltas, trajtimi periodontal duket se përmirëson ndjeshmërinë ndaj insulinës dhe kontrollin e glicemisë.
Është vlerësuar se nëse një diabetik futet në një program kontrolli dhe kujdesi dentar sjell një reduktim të kostos së nevojshme për kurimin me 20%. Mjeku gjatë vizitës së tij të kontrollit te pacientët diabetikë duhet të bëjë pyetje të sakta mbi shëndetin oral: duhet të pyesë për shembull nëse kanë humbur dhëmbë, nëse disa i lëvizin, nëse gingivat janë të skuqura ose ka recesion gingival. Si dhe është e nevojshme që të njoftohen pacientët në mënyrë që të kenë dijeni se një kontroll i keq i glicemisë mund të provokojë periodontitin dhe duhet t'i drejtojë ata te dentisti në rast nevoje, duke u koordinuar me të për të garantuar një kontroll efikas të glicemisë gjatë trajtimit oral, pa të cilin terapia stomatologjike duket se nuk ka asnjë dobi.

Përktheu: Valbona Spahia