Efikasiteti diagnostikues i radiografisë panoramike në lezionet e sinusit të nofullës

Nga Lara Figini

Radiografia panoramike, e njohur edhe si ortopantomografi (OPG), është përdorur zakonisht në ekzaminimet e dhimbjes faciale dhe dentare. Ky ekzaminim radiografik është në gjendje të vizualizojë kockën e nofullave, dhëmbët dhe strukturat e tyre të mbështetjes ndërmjet të cilave është edhe artikulacioni temporo-mandibular dhe sinuset e nofullave.

Kjo teknikë radiografike bazohet në një "pikë fokusimi" gjatë harkut dentar që përdoret për të prodhuar një imazh bidimensional të nofullave. Disavantazhi i kësaj teknike është që strukturat jashtë pikës së fokusit mund të rezultojnë si të fshira ose mund të duken më pak.

Sinuset e nofullave, për shembull, përgjithësisht janë me diametër antero-posterior nga 28,9 mm deri 47,6 mm, që është një diametër më i madh sesa fokusi që është projektuar për kockën alveolare.

Imazhi panoramik, pra përfshin vetëm një pjesë të sinuseve të nofullave, prandaj mund të rezultojë limitues për diagnozën e lezioneve të sinusit.

Tipologjia e kërkimit dhe modaliteti i analizës
Në një studim të publikuar në OOO në mars 2019 është kërkuar të përcaktohet:
• efikasiteti diagnostikues i ortopantomografisë (OPG) në diagnozën e sëmundjeve të sinusit duke përdorur tomografinë e kompjuterizuar me rrezatim në formë koni (CBCT) si standard krahasimi;
• cilat sëmundje mund të diagnostikohen duke përdorur radiografinë panoramike dhe cilat me CBCT.
Autorët e studimit kanë marrë në konsideratë imazhet e 714 individëve që i janë nënshtruar OPG dhe CBCT në të njëjtën ditë, që më pas janë vlerësuar në mënyrë të ndarë nga 2 stomatologë ekspertë të radiologjisë. Rezultatet janë krahasuar duke përdorur metodat statistikore AC1 të Gwet.

Rezultate
Në total, janë analizuar 1322 sinuse të nofullave. Ndjeshmëria e OPG për zbulimin e patologjive të mundshme të sinusit të nofullës ka rezultuar e dobët në krahasim me atë të CBCT, ndërsa specificiteti i lartë.

Ndjeshmëria e OPG për zbulimin e trashjes së mukozës së sinusit të nofullës ka rezultuar 36,7%. Vlera parashikuese pozitive e OPG-së për diagnozën e trashjes së mukozës ka rezultuar 79,9% por vlera parashikuese negative ka qenë 51,9%.

Marrëveshja ndërmjet dy ekzaminuesve ka rezultuar e fortë (0,912) për të gjitha lezionet me përjashtim të trashjes së mukozës.

Konkluzione
Nga të dhënat e nxjerra nga ky studim, që në fakt duhet të konfirmohen me punime të tjera analoge, mund të dalim në përfundimin se radiografia ka një efikasitet të ulët në diagnozën e sëmundjeve të sinusit edhe nëse ekzaminohet nga një dentist ekspert i radiologjisë.

OPG mund të jetë e dobishme për të përjashtuar sëmundjen, por një skanim tridimensional me CBCT është i nevojshëm për hetimin përfundimtar të lezioneve të sinusit.

Implikime klinike
Kurdo që stomatologu të diagnostikojë lezionet e sinusit të nofullës është e këshillueshme që të rekomandojë një tomografi të kompjuterizuar CBCT në vend të një OPT, sepse ofron një saktësi më të madhe në diagnostikimin e patologjive të sinusit të nofullës, pavarësisht kostove më të larta dhe dozës më të madhe të rrezatimit për pacientin.

Për më tepër:
Constantine S, Clark B, Kiermeier A, Anderson P. Panoramic radiography is of limited value in the evaluation of maxillary sinus disease. Oral Surg Oral Med Oral Pathol Oral Radiol marzo 2019;127:237-46.

Përktheu: Valbona Spahia