Veset që dëmtojnë mastikacionin: kafshimi i buzëve apo ngrënia e thonjve

Nga Norberto Maccagno

Ekzistojnë një numër i madh i zakoneve të këqija që me kalimin e kohës mund të shkaktojnë probleme në mbylljen korrekte të gojës dhe mastikacionit. Ndërmjet të gjithave vesi më i rrezikshëm dhe më i vështirë për t'u ndërprerë është thithja e gishtit të madh të dorës: pediatri dhe ortodontisti duhet të udhëzojnë të dy prindërit në lidhje me detyrën e vështirë për të ndihmuar fëmijën që të heqë dorë nga ai ves. Shumë i zakonshëm është edhe kafshimi i buzëve.

"Në këto raste mund të vijnë në ndihmë përdorimi i një substance zbutëse siç është gjalpi i kakaos, vazelina ose një krem që mund të përhapet në pjesën e buzës te fëmijët që e kafshojnë," - këshillon profesor Gualtiero Mandelli, -"por nevojiten disa muaj që të ndërpritet një zakon, pra është mirë që të ndërhyhet sa më parë."

Një zakon tjetër i keq është shtyrja e dhëmbëve me gjuhë: një nga veset muskulare më të vështira për t'u korrigjuar. "Observoni fëmijën tuaj: nëse ka zakon të zgjasë gjuhen para, çdo herë që kapërdihet do ta shtyjë gjuhën përpara duke e futur ndërmjet dhëmbëve maksilarë dhe mandibularë gjatë okluzionit. Ky është shkaku i shumë rasteve të vështirë ortodontikë. Një ves tjetër i dëmshëm është edhe ngrënia e thonjve. Shumë fëmijë fillojnë ta zhvillojnë këtë ves që në moshën 2 vjeçare. Ky ves përcakton zakonisht te fëmijët rrotullimet e dhëmbëve që vihen re nga dentisti në sektorin anterior të gojës. Por jo vetëm kjo. Pasi mund të kontribuojë edhe në një gërryerje të lehtë të sipërfaqeve mastikatore përveç futjes së mikrobeve në gojë. Edhe ky zakon ndërpritet me vështirësi me anë të ndërhyrjeve të shpeshta."

Njësoj i dëmshëm është edhe vesi i kafshimit të faqeve. Për të kuptuar nëse një fëmijë kafshon faqet nuk është e thjeshtë për një prind, prandaj duhet kontrolluar në fillim nga jashtë për të kuptuar shenjat e lëvizjes së gojës.

Bruksizmi, pra tendenca e "kërcitjes së dhëmbëve" është një tjetër zakon i keq. Te disa fëmijë ka një tendencë për shtrëngimin e nofullave gjatë gjumit. Bëhet fjalë për shprehinë e një zakoni muskular që manifestohet si një fenomen i pavullnetshëm "kontraktim-lëshim". Kështu fëmija mund të bëjë zhurmë duke fërkuar dhëmbët gjatë gjumit. Çfarë duhet bërë?
"Nuk mund të bëjmë shumë për dhëmbët e qumështit te një fëmijë me bruksizëm,"- thotë profesori, - "me gjithë atë fërkim dhëmbët shkatërrohen nga gërryerja më shpejt nga sa mund të shkatërrohen nga kariesi. Por fëmija duhet të vëzhgohet me shumë vëmendje kur është momenti i ndërrimit të dhëmbëve."

Përktheu: Valbona Spahia