Alergjitë nga kontakti me materialet dentare

Nga Lara Figini

Rastet e alergjive janë në rritje të vazhdueshme prej disa vitesh: sipas OBSH-së, numri i personave alergjikë ka kaluar nga 3% në 30% nga viti 1960 deri në vitin 1995. Sipas një studimi të Langen et al. në 2013 sëmundjet alergjike më të zakonshme janë alergjitë nga bari (14,8%), astma bronkiale (8,6%) dhe dermatiti nga kontakti (8,1%).

Futja e materialeve të reja në stomatologji ka rritur probabilitetin e një intolerance ose reaksioni alergjik pas trajtimeve dentare. Në këtë fushë, reaksioni i tipit IV, reaksioni i vonuar i ndërmjetësuar nga qelizat ose reaksioni i vonshëm në lidhje me materialet dentare janë veçanërisht të rëndësishëm. Metoda standarde për zbulimin alergjive nga kontakti paraqitet nga patch test, me substanca prove të standardizuara.

Megjithatë, diagnoza rezulton e vështirë për shkak të falsë negativëve ose falsë pozitivëve të shpeshtë. Por specifikohet edhe që informacionet mbi komponentët e materialeve dentare, si dhe lëshimi i mundshëm i tyre në mjedisin intraoral, mungojnë ose janë të paplota.

Tipologjia e kërkimit dhe modaliteti i analizës
Në një studim observues, të publikuar në Swiss Dental Journal në korrik 2019, autorët kanë kërkuar kuantifikimin e shpeshtësisë dhe simptomave të alergjive ndaj materialeve dentare.

Autorët kanë grumbulluar të dhënat në Departamentin e protezave dhe materialeve dentare në Lipsia, ku të dhënat klinike të pacientëve janë grumbulluar në mënyrë sistematike nga viti 2012. Rezultatet e analizave objektive të mukozës dhe simptomat e çrregullimeve që referohen nga pacientët janë dokumentuar në mënyrë të detajuar në një skedë teknike të projektuar posaçërisht.

Ky studim ka përfshirë 86 individë (83,7% gra dhe 16,3% burra) me simptoma orale të një alergjie nga kontakti me materialet dentare me moshë mesatare 63 vjeç (24-86 vjeç).

Rezultatet
Alergenët më të zakonshëm kanë rezultuar metalet si nikeli dhe kobalti. Shumë alergji janë gjurmuar nga komponentë për trajtimet kozmetike të kompozitave. 52,4% e pacientëve ka treguar ndryshime të mukozës.

Format alergjike më të shpeshta kanë rezultuar stomatiti nga kontakti (54,5%) dhe lezionet likenoide orale (20,5%). 86% e pacientëve ka referuar shqetësime subjektive, ndërmjet të cilave më të shënuarat kanë qenë dhimbja dhe ndjesia e djegies në gojë.

Konkluzione
Nga të dhënat që dalin nga ky studim, që duhet të gjejnë konfirmim me punime të tjera analoge, mund të dalim në përfundimin se alergjitë nga kontakti me materialet dentare nuk janë të shpeshta dhe forma më e përhapur është stomatiti nga kontakti (54,5%).

Implikime klinike
Materialet dentare janë ndërmjet materialeve artificiale më të zakonshme që inkorporohen në trupin e njeriut. Është përgjegjësia e dentistit që të zgjedhë se cilat materiale dhe kombinime të përdoren. Procesi i prodhimit dhe përpunimit intraoral duhet të bëhet në mënyrë të ndërgjegjshme dhe të koordinohen me kujdes për të reduktuar në minimum problematikat për shëndetin e pacientëve.

Një anamnezë alergjike dentare e përshtatshme, një ekzaminim klinik në kavitetin oral për të zbuluar ndryshimet e mukozës orale, analiza specifike e protezave dentare dhe skrinimi për çrregullimet psikogjene janë të nevojshme për të qartësuar origjinën e këtyre simptomave.

Për më tepër:
Olms C, Yahiaoui-Doktor M, Remmerbach TW. Contact allergies to dental materials. Swiss Dent J 2019 Jul 22;129(7-8):571-9.

Përktheu: Valbona Spahia