Performanca klinike deri në 11 vjet e onlays okluzalë në qeramikën me disilikat litiumi te pacientët me dhëmbë shumë të gërryer

Nga Lara Figini

Falë ndryshimeve të vazhdueshme socioekonomike, progreseve në trajtimin e shëndetit oral dhe një ndërgjegjësimi më të madh të rëndësisë së një higjiene të saktë orale sot pacientët arrijnë të mbajnë dhëmbët e tyre natyralë më gjatë, duke reduktuar normat e ekstraktimit për shkak të lezioneve karioze ose periodontale.

Aspektet negative që lidhen me dhëmbët që tashmë janë funksionalë për një kohë më të gjatë janë abrazioni, fërkimi dhe erozioni ose një kombinim ndërmjet tyre, të cilat po konsiderohen gjithnjë e më shumë faktorë kryesorë të riskut për humbjen e parakohshme të strukturës së fortë të dhëmbit dhe si pasojë të humbjes së dimensionit vertikal të okluzionit (VDO).

Për fat të keq edhe pacientët më të rinj janë prekur nga këto probleme për shkak të bruksizmit nokturn, konsumimit të shpeshtë të substancave ose ushqimeve acide apo patologjive si gastriti, refluksi gastro-ezofageal, etj.

Rehabilitimi i këtyre elementeve dentare që janë shumë të gërryer nuk është gjithnjë i lehtë. Falë përmirësimeve të vazhdueshme të teknologjisë adezive dhe të shkencës së materialeve, protokollet e trajtimit minimalisht invazivë tashmë zbatohen më shumë në mjekësinë moderne restorative. Onlay okluzalë adezivë të karakterizuar nga një përgatitje specifike, lejojnë një humbje mjaft të reduktuar të indeve të forta të dhëmbëve.

Një zgjidhje trajtimi për rehabilitimin e një serie të të gjithë dhëmbëve në të dyja harkadat dentare që janë gërryer shumë është ajo që parashikon realizimin e onlay okluzalë në qeramikë monolitike në disilikat litiumi.

Tipologjia e kërkimit dhe modaliteti i analizës
Në një studim të publikuar në Dental Materials në shtator 2019, autorët kanë vlerësuar mbijetesën dhe normën e komplikacioneve të onlay okluzalë monolitikë të realizuar në qeramikë me disilikat litiumi te pacientët me gërryerje të rënda të dhëmbëve me një follow-up deri në 11 vjet.

Në këtë studim klinik perspektiv jo të randomizuar në 7 pacientë (4 meshkuj, 3 femra; mosha mesatare: 44,3±6,56 vjeç) janë kryer restaurime në të gjithë dhëmbët me një total prej 103 onlay okluzalë të cementuar në mënyrë adezive të realizuar në qeramikë me disilikat litiumi (IPS e.max Press, Ivoclar Vivadent, Schaan, Liechtenstein).

Të gjitha restaurimet janë kontrolluar dhe vlerësuar gjatë vizitave rutinë të kontrolleve vjetore për: (a) çngjyrosje marginale, (b) karies sekondar, (c) integritet marginal, (d) strukturën e sipërfaqes, (e) frakturë të restaurimit, (f) gërryerje lokale.

Të dhënat janë analizuar statistikisht duke përdorur vlerësimin e Kaplan-Meier.

Rezultate
Onlay okluzalë me disilikat litiumi monolitik kanë paraqitur një normë mbijetese me 100%. Katër restaurime nga i njëjti pacient (3,9%) kanë paraqitur çngjyrosje marginale, një pas 60 muajsh dhe 3 pas 108 muajsh. Një restaurim (1%) ka paraqitur një krisje marginale (komplikacion teknik) pas 120 muajsh.

Nuk janë zbuluar komplikacione biologjike, zhvendosje ose karies sekondar dhe parametrat periodontalë të testuar kanë qenë të shkëlqyer.

Konkluzione
Nga të dhënat e nxjerra nga ky studim, të cilat duhet të konfirmohen me punime të tjera analoge, mund të dalim në përfundimin se për 11 vjet onlay okluzalë monolitikë në qeramikë me disilikat litiumi mund të konsiderohen një opsion trajtimi i besueshëm për rehabilitimet totale në të dyja harkadat te pacientët me gërryerje të madhe të dhëmbëve.

Për më shumë informacione:
Edelhoff D, Güth JF, Erdelt K, Brix O, Liebermann A. Clinical performance of occlusal onlays made of lithium disilicate ceramic in patients with severe tooth wear up to 11 years. Dent Mater 2019 Sep;35(9):1319-30.

Përktheu: Valbona Spahia