Fëmijët dhe adoleshentët me diabet të tipit 1 dhe prevalenca e kariesit dentar

Nga Lara Figini

Diabeti melit i tipit 1 është një sëmundje autoimune kronike e karakterizuar nga shkatërrimi i qelizave beta të pankreasit dhe si pasojë e mungesës së prodhimit të insulinës. Prek më shumë se gjysmë milioni fëmijë në të gjithë botën dhe prevalenca e incidenca e tij është në rritje sidomos, në vendet evropiane.

Studime të shumta epidemiologjike kanë referuar se diabeti i tipit 1 rrit riskun e sëmundjeve kardiovaskulare, sëmundjeve renale dhe rënien konjitive te fëmijët dhe adoleshentët. Për më tepër, një numër në rritje i studimeve indikon një lidhje ekzistuese ndërmjet diabetit të tipit 1 dhe komplikacioneve orale, duke përfshirë sëmundjet periodontale dhe kariesin dentar.

Studimet e disponueshme aktualisht në literaturë, që vendosin prevalencën e saktë të kariesit të dhëmbëve ndërmjet fëmijëve dhe adoleshentëve me diabet të tipit 1, për fat të keq bien ndesh me njëri-tjetrin dhe nuk ekziston ndonjë meta-analizë sasiore që lidhje me këtë.

Tipologjia e kërkimit dhe modaliteti i analizës
Në një rishikim sistematik, të publikuar në BMC Oral Health në shtator 2019, autorët kanë kryer një kërkim bibliografik në nivel botëror, në bazë të një strategjie kërkimi të vendosur më parë, nëpërmjet portaleve PubMed, Embase dhe China National Knowledge, për të gjitha studimet e përshtatshme mbi prevalencën e kariesit dentar te fëmijët dhe tek adoleshentët me diabet të tipit 1 të publikuar në periudhën nga korriku 1971 deri në dhjetor 2018.

Prevalenca është llogaritur me intervale besueshmërie në 95% (IC me 95%) dhe analizat e nëngrupeve janë llogaritur duke përdorur një model të efekteve shkakësore.

Rezultate
Nga 358 artikuj të identifikuar fillimisht, janë përfshirë në rishikimin përfundimtar një total prej 10 artikujsh që kanë përfshirë 538 pacientë.

Prevalenca kompleksive e kariesit dentar ndërmjet fëmijëve dhe adoleshentëve me diabet të tipit 1 ka rezultuar 67%. Prevalenca ka rezultuar të jetë më e lartë në Amerikën e Jugut (84%) dhe më e ulët te pacientët diabetikë me një kontroll të mirë metabolik (47%).

Konkluzione
Nga të dhënat e marra nga ky rishikim, që duhet të konfirmohen me punime të tjera analoge mund të dalim në përfundimin se prevalenca e kariesit dentar është e lartë ndërmjet fëmijëve dhe adoleshentëve me diabet të tipit 1.

Implikime klinike
Duke u nisur nga prevalenca e lartë e kariesit dentar ndërmjet individëve të rinj të prekur nga diabeti i tipit 1, skrinimi dhe trajtimi parandalues duhet të përfshihen në rutinë si trajtime në klinikat dentare për fëmijët dhe adoleshentët diabetikë, veçanërisht tek ata me kontroll të dobët metabolik.

Për më shumë informacione:
Wang Y, Xing L, Yu H, Zhao L. Prevalence of dental caries in children and adolescents with type 1 diabetes: a systematic review and meta-analysis. BMC Oral Health 2019 Sep 14;19(1):213.

Përktheu: Valbona Spahia