Inlay dhe onlay Vs kurora: cila garanton një mbijetesë më të gjatë?

Nga Simona Chirico

Përdorimi i materialeve të restaurimit që lejojnë aderimin në sipërfaqet dentare dhe në këtë mënyrë ruajtjen e sa më shumë indeve dentare ka përcaktuar dhe kushtëzuar zgjedhjen e stomatologut në rehabilitimin e elementeve dentare me karies apo atyre që janë gërryer.

Janë zgjedhur gjithnjë e më shpesh për restaurimet indirekte parciale në krahasim me ato totale, duke lejuar në këtë mënyrë, rikthimin jo vetëm të funksionalitetit të një elementi por edhe garantimin e estetikës.

Por këto lloje restaurimesh parciale, si inlay dhe onlay janë po aq të besueshme sa kurorat klasike? Sa zgjasin?

Tipologjia e kërkimit dhe modaliteti i analizës
Studimi i Vagropoulou et al., i publikuar në Journal of Oral Rehabilitation, ka konfirmuar që këto restaurime janë po aq të sigurt sa kurorat, duke analizuar përqindjen e mbijetesës për 5 vjet.

Është kryer një kërkim elektronik në databaza të ndryshme dhe janë marrë në ekzaminim artikuj të publikuar ndërmjet vitit 1980 dhe 2017. Fillimisht janë identifikuar 2849 artikuj, por vetëm 9 prej tyre janë seleksionuar. Heterogjeniteti i studimeve nuk ka lejuar as një meta-analizë as ndonjë krahasim të konsiderueshëm ndërmjet llojeve të restaurimeve apo materialeve.

Kampionet e kërkimit janë ndarë në 4 grupe: inlay, onlay, inlay+onlay, kurorë. Për këta 4 grupe janë vlerësuar përqindjet e mbijetesës me 5 vjet dhe komplikimet e dështimit.

Rezultate
Përqindja e mbijetesës për 5 vite ishte e barabartë me:
• inlay 90,89%;
• onlay 93,5%;
• inlay+onlay 99,43%;
• kurora 95,38%.

Analiza statistikore ka demonstruar se kariesi është komplikimi kryesor biologjik për të gjitha llojet e restaurimeve, i ndjekur nga fraktura e rrënjës dhe nga problematikat endodontike.

Ndërsa fraktura e qeramikës paraqet një komplikacion të lidhur me materialin e restaurimit më të zakonshëm, të ndjekur nga humbja e retencionit dhe krisjet.

Konkluzione
Mbijetesa prej 5 vitesh për inlay, onlay dhe kurorat është shumë e lartë, mbi 90%. Prandaj është e mundur që të afirmohet se restaurimet indirekte parciale janë një alternativë e mirë kundrejt atyre totale.

Për më tepër: Vagropoulou GI, Klifopoulou GL, Vlahou SG, Hirayama H, Michalakis K. Complications and survival rates of inlays and onlays vs complete coverage restorations: a systematic review and analysis of studies. J Oral Rehabil 2018;45(11):903-20.

Përktheu: Valbona Spahia