Implantet imediate, mbijetesa afatgjatë: follow up për 22 vjet

Nga Lara Figini

Metoda konvencionale e terapisë implantare dentare parashikon pozicionimin e implantit disa muaj pas ekstraktimit të dhëmbit për të garantuar shërimin e plotë, të ndjekur nga 3 deri në 6 muaj të osteointegrimit pa ngarkesë protetike.

Kjo procedurë për fat të keq ka disavantazhe, si koha e gjatë e trajtimit, kostot e shtuara, shqetësimi i pacientit dhe nevoja për ndërhyrje të mëtejshme kirurgjikale.

Për të kaluar këto disavantazhe është propozuar pozicionimi i implanteve menjëherë pas ekstraktimeve. Pozicionimi i menjëhershëm i implantit mund të ndalojë përthithjen e kockës alveolare, duke reduktuar kështu nevojën për kryerjen e procedurave të rigjenerimit ose grafteve kockore; e për më tepër kjo teknikë i përgjigjet më së shumti kërkesave estetike të pacientëve.

Por cila është mbijetesa e implanteve imediate?

Tipologjia e kërkimit dhe modaliteti i analizës
Në një studim retrospektiv, të publikuar në Journal of Prosthodontics në janar 2020, autorët kanë vlerësuar rezultatin e trajtimit me implantet e vendosura menjëherë pas ekstraktimeve dentare, pa rigjenerimin kockor ose graftet, për 22 vite.

Grupi i pacientëve të përfshirë në studim ka marrë terapinë implantare në 1997, që përfshinte pozicionimin kirurgjikal dhe rehabilitimin protetik. Mosha mesatare e individëve në momentin e ndërhyrjes implantare ishte 40±5,54 vjeç. Një total prej 35 individësh kanë marrë 36 implante të vendosur menjëherë pas ekstraktimeve dentare pa rigjenerim ose grafte kockore.

Protezat përfundimtare janë vendosur 4 deri në 6 muaj pas pozicionimit të implantit. Rezultatet e trajtimit implantar janë vlerësuar nëpërmjet parametrave klinikë dhe radiografikë që merren gjatë vizitave të follow up - it me 1, 5, 10, 15, 20 dhe 22 vite pas vendosjes së tyre.

Rezultate
Nga 35 pacientë që kanë qenë në fillim, pesë kanë ikur sepse janë transferuar në vende të tjera, prandaj nuk ka qenë e mundur të vlerësohen në follow up. Një pacient ka humbur implantin gjatë periudhës së osteointegrimit përpara trajtimit protetik. Nuk ka pasur asnjë dështim tjetër implantar e nuk janë verifikuar komplikacione gjatë periudhës së mbetur të follow up, duke ofruar kështu një normë mbijetese kumulative me 97,2% për 22 vite.

Ndryshimi në nivelin kockor marginal ka rezultuar inferior me 2 mm në pjesën më të madhe të individëve të kontrollit për 22 vite. Humbja mesatare e kockës nga koha 0 (bazë) deri pas 22 vitesh follow up ka qenë 1,61 mm dhe mesatarja e nivelit kockor për 22 vite ka rezultuar 2,13±0,023 mm nga platforma implantare, që është përdorur si pikë referimi.

Konkluzione
Nga të dhënat e nxjerra nga ky studim retrospektiv, që duhet të konfirmohen me punime të tjera analoge, mund të dalim në konkluzionin se pozicionimi imediat i implanteve pas ekstraktimeve dentare tregon një prognozë të shkëlqyer edhe kur nuk kryhen disa nga rigjenerimet apo graftet kockore.

Implikime klinike
Rezultati i studimit kontribuon në besueshmërinë e praktikës klinike të protokolleve të pozicionimit të implanteve imediate menjëherë pas ekstraktimeve dentare. Përmasat e vogla të kampionit, mungesa e një grupi për krahasim, radiografitë e pastandardizuara dhe natyra retrospektive e projektimit të studimit paraqesin limitet e tij.

Për më tepër: Assery M. A 22-year follow up of immediate implant placement without bone augmentation: a case series study. J Prosthodont 2020 Jan 9:1-7.

Përktheu: Valbona Spahia