Implantet post-ekstraktive: këshillat dhe indikacionet praktike

Ka pasur opinione shumë të ndryshme dhe avantazhe e disavantazhe të dukshme që lidhen me zgjidhjen e gjetur. Për t'u përpjekur që të japim një përgjigje bazuar në faktet objektive dhe jo mbi opinionet e zakonshme është kryer një trial klinik që ka rekrutuar numrin më të madh të pacientëve që ka qenë deri më tani i pranishëm në literaturën shkencore ndërkombëtare dhe është publikuar në Clinical Trials in Dentistry.

Ky studim i randomizuar i kontrolluar krahason implantet e veçanta të vendosura menjëherë pas ekstraktimit dentar (70 pacientë) me implantet e vendosura pas një periudhe shërimi prej 6 javësh (70 pacientë) dhe me implantet e vendosura 4 muaj më pas (70 pacientë) të trajtuar nga një profesionist i vetëm.

Pjesët post-ekstraktive janë rikonstruktuar kur ka qenë e nevojshme, vetëm në zonat estetike ose nëse kanë qenë shumë të dëmtuara. Ngarkesa implantare është shtyrë me 4 - 6 muaj dhe pacientët janë ndjekur për 3 vite nga vendosja protetike fillestare. Duhet të marrim në konsideratë që numri i pacientëve të përfshirë në studim, pavarësisht se ishte i lartë, është ende i pamjaftueshëm për të nxjerrë indikacione përfundimtare. Në çdo rast dështimet implantare kanë qenë 3 - 4 herë më të ulëta sesa implantet e vendosura pas një periudhe shërimi 4 mujore dhe komplikacionet kanë qenë më të pakta edhe pse të dhënat nuk janë statistikisht të rëndësishme.

Humbja e kockës perimplantare ka treguar diferenca statistikisht të rëndësishme por klinikisht të parëndësishme (nga 0,06 deri në 0,16 mm) në favor në implanteve post-ekstraktive imediate, ndërsa përmbushja e kërkesave të pacientëve qoftë nga ana funksionale qoftë nga ana estetike nuk ka pasur tendenca apo diferenca të konsiderueshme statistikisht ndërmjet procedurave të ndryshme. Një e dhënë statistikisht e rëndësishme dhe me interes për ne stomatologët ka qenë ajo e vlerësimit estetik që është bërë nga një stomatolog që nuk ka pasur dijeni për llojin e terapisë së kryer te këta pacientë.

Të dhënat kanë rezultuar në favor të implanteve post-ekstraktive imediate veçanërisht përsa i përket niveleve të indeve të buta perimplantare dhe deficitit të vëllimit në zonën vestibulare të implantit. Këto rezultate mbështesin hipotezën se implantet imediate mund të reduktojnë riabsorbimin alveolar pas ekstraktimit.

Si t'i interpretojmë këto informacione?
Interpretimi i rezultateve të këtij studimi është mjaft kompleks, por të paktën rezultatet janë në një linjë me studimet e tjera klinike që janë kryer nga i njëjti grup kërkuesish. Interpretimi im personal është që për reduktimin në minimum të riskut të dështimeve të mundshme implantare dhe komplikacioneve do të ishte më mirë të prisnim për një periudhë shërimi 4 mujore pas ekstraktimit. Nga ana tjetër nëse pacienti ka primare një estetikë më të mirë dhe kohë më të shkurtër rehabilitimi, atëherë implantet post-ekstraktive duhet të merren në konsideratë. Bëhet fjalë për vendime që duhen marrë së bashku me pacientin dhe në bazë të situatës klinike (rast i thjeshtë ose kompleks), personalitetit të pacientit dhe eksperiencës sonë specifike klinike.

Nën kujdesin e: Profesor Marco Esposito

Për më tepër: Felice P, Barausse C, Buti J, Gessaroli M, Esposito M. Immediate, immediate-delayed (6 weeks) and delayed (4 months) post-extractive single implants: 3-year post-loading data from a randomised controlled trial. Clinical Trials in Dentistry 2019;1:5-23.

Përktheu: Valbona Spahia