Trajtimi i peri-implantitit: vlerësimi i dhimbjes post-operative

Nga Lara Figini

Trajtimi implantar është bërë një opsion shumë i kërkuar nga pacientët që kanë humbur një apo më shumë dhëmbë. Ashtu si në të gjitha fushat mjekësore, edhe këtu mund të verifikohen infeksione që lidhen me implantin.
Peri-implantiti është përkufizuar si një reagim inflamator që lidhet me humbjen e kockës përreth një implanti funksional. Kura e peri-implantitit parashikon trajtime jo kirurgjikale që paraprijnë trajtimet kirurgjikale.
Për momentin nuk ka informacione në literaturë mbi dhimbjen dhe shqetësimet post-operative që shkaktohen nga trajtimi i peri-implantitit. Njohuri më të mira të dhimbjes dhe shqetësimeve pas trajtimit të peri-implantitit do t'i ofrojnë pacientëve dhe profesionistëve informacione të çmuara.

Tipologjia e kërkimit dhe modaliteti i analizës
Në një studim klinik, të publikuar në Acta Odontologica Scandinavica në nëntor/dhjetor 2019, autorët kanë vlerësuar intensitetin dhe cilësinë e dhimbjes pas trajtimit jo-kirurgjikal dhe kirurgjikal të peri-implantitit.
Një total prej 30 pacientësh me diagnozë të peri-implantitit janë përfshirë në studim. Pacientët kanë referuar intensitetin e dhimbjes, duke përdorur shkallën VAS, pas trajtimit jo kirurgjikal dhe atij kirurgjikal.
Të dhënat janë regjistruar për një javë pas çdo trajtimi. Janë regjistruar të dhëna edhe rreth cilësisë së dhimbjes dhe nëse ka pasur konsumim të analgjezikëve. Faktorët që janë konsideruar dhe analizuar në studim kanë qenë numri i implanteve, shkalla e rëndesës së peri-implantitit (humbja e kockës milimetrike përreth implantit të prekur më shumë), lokalizimi i implantit, duhanpirja dhe seksi.

Rezultate
Një diferencë statistikisht e konsiderueshme rreth intensitetit të dhimbjes është ndeshur ndërmjet ditës zero dhe ditës së parë për trajtimet jo kirurgjikale dhe kirurgjikale të peri-implantitit (p <.05).
Numri i implanteve, shkalla e rëndesës së peri-implantitit, lokalizimi i implantit, duhanpirja dhe seksi nuk kanë rezultuar statistikisht të rëndësishëm në lidhje me intensitetin e dhimbjes post-trajtim.
Sasia e dhimbjes që është raportuar më shpesh ka qenë ndjesia e pulsimit/dhimbja dhe mpirja qoftë për trajtimin jo kirurgjikal qoftë për atë kirurgjikal.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, mund të dalim në konkluzionin se nivelet e dhimbjes janë të ulët apo të moderuar për pjesën më të madhe të pacientëve pas trajtimit të peri-implantitit. Dhimbja është më e fortë në dy ditët e para pas trajtimit. Dhimbja e përhapur dhe mpirja janë tipologjitë e dhimbjeve që janë raportuar më shpesh.

Implikime klinike
Duhet marrë në konsideratë që në këtë studim konsumimi i analgjezikëve ka mundur të influencojë perceptimin e dhimbjes, sidomos në ditën zero, pra është përdorur një sasi më e madhe e analgjezikëve. Prandaj një efekt i mundshëm "carry-over" duhet të merret në konsideratë për ditën e parë.
Ashtu siç parashikohej, duhet të merren analgjezikët pas trajtimit kirurgjikal e jo pas atij jo kirurgjikal.

Për më shumë informacione:
Norum TA, Aass AM, Koldsland OC. Pain and morbidity after non-surgical and surgical treatment of peri-implantitis. Acta Odontologica Scandinavica 2019;77(8):624-9

Përktheu: Valbona Spahia