Një kontroll te dentisti mund të mbrojë edhe mushkëritë

Shumë persona dhe jo vetëm fëmijët kanë frikë nga dentisti, por mesa duket një vizitë tek ai zbulon një aleat të çmuar për organizmin, me një efekt që shkon përtej parandalimit të kariesit dhe shqetësimeve gingivare. Ky ka qenë rezultati i nxjerrë nga një punim i prezantuar së fundmi në kursin e Id week, takimi vjetor që përfshin Infectious diseases society of America, Society for healthcare epidemiology of America, Hiv medicine association dhe Pediatric infectious diseases society.

"Kontrollet e rregullta te dentisti janë të rëndësishme sepse reduktojnë riskun e pneumonisë" - shpjegon Michelle Doll, e Universitetit të Virginia Commonwealth dhe autorja e parë e kërkimit, duke kujtuar që çdo vit rreth një milion persona sëmuren me pneumoni në Shtetet e Bashkuara dhe 50 mijë vdesin. Për të arritur në këto rezultate, Doll dhe kolegët e saj kanë analizuar të dhënat relative të mbi 26 mijë individëve duke zbuluar që personat që nuk kanë qenë kurrë te një dentist kishin një probabilitet 86% më të madh për të marrë një pneumoni bakteriale në krahasim me ato që kryenin vizita të rregullta te dentisti, 2 herë në vit.

Por çfarë lidhje ka midis higjienës orale dhe shëndetit të mushkërive? "Të gjithë mund ta marrin pneumoninë, edhe pse patologjia është më e zakonshme te personat që kanë sëmundje pulmonare ose sindroma si AIDS" - saktëson kërkuesja e cila vijon më pas:
-"Ekziston një lidhje e qartë midis higjienës orale dhe pneumonisë dhe nuk ka dyshime që vizitat stomatologjike janë themelore për të mbajtur një higjienë të mirë orale."
Në bazë të kësaj lidhjeje janë bakteret që popullojnë gojën.
" Zgavra orale nuk do të jetë kurrë një mjedis steril, por me siguri një higjienë e mirë orale mund të limitojë numrin e baktereve të pranishme në këto zona" - vijon Doll.

"Këto të dhëna nënvizojnë sesi shëndeti oral lidhet ngushtë me shëndetin e përgjithshëm të organizmit dhe sugjerojnë edhe rëndësinë e përfshirjes së trajtimeve dentare në kontrollet rutinë për shëndetin." - përfundon ajo.

Përktheu: Valbona Spahia