Lidhja ndërmjet çrregullimeve të gjumit dhe patologjive orale

Çrregullimet e gjumit prekin një pjesë të madhe të të rriturve dhe i sjellin atyre pasoja të rëndësishme si në shëndetin e përgjithshëm ashtu edhe në cilësinë e jetesës. Në një studim të publikuar së fundmi janë përshkruar: etiologjia, aspektet klinike dhe karakteristikat e patologjive stomatologjike që lidhen me çrregullimet e gjumit dhe që ofrojnë elemente të dobishme për menaxhimin e pacientit që vuan nga këto patologji.

Patologjitë më të shpeshta janë tre: bruksizmi, dhimbja orofaciale dhe ndërprerjet e përkohshme të frymëmarrjes që pengojnë gjumin (OSAS, Obstuctive Sleep Apnea Syndrom).

Bruksizmi

Kur bruksizmi (kërcitja e dhëmbëve) shfaqet natën verifikohet sidomos në fazat e gjumit të lehtë jo-REM, vetëm 10% në fazën REM dhe lidhet me faza të pagjumësisë. Mund të flasim për dy lloje të bruksizmit: një primar ose idiopatik, pa një shkak të identifikueshëm dhe një dytësor që lidhet me gjendjet socio-psikologjike ose gjendje të tjera mjekësore. Për sa i përket trajtimit kërkohet të menaxhohet çrregullimi dhe simptomat e mundshme me qëllim parandalimin e komplikacioneve të mundshme në aparatin stomatognatik.

Dhimbja orofaciale

Dhimbja orofaciale mund të përkufizohet si një mosfunksionim i degës së tretë të nervit trigeminal. Lidhet më shpesh me çrregullimet temporomandibulare, duke përfshirë edhe kuadrot e sindromës së gojës që djeg. Përgjithësisht, çrregullimet e gjumit mund të jenë shkaktar ose të përkeqësojnë dhimbjen kronike.

OSAS

OSAS karakterizohet nga një ndërprerje e plotë e frymëmarrjes, që përsëritet, zgjat të paktën 10 sekonda, shkaktohet nga kolapsi i rrugëve të sipërme të frymëmarrjes, çrregullimi mund të paraqitet edhe në formën më të lehtë me një reduktim jo të plotë (të paktën 50%) të fluksit të frymëmarrjes. Terapia me mjete orale tregohet në rastet e OSAS në gjendje të lehtë ose të moderuar ose në rastet e OSAS në gjendje të rëndë kur frymëmarrja me presion të vazhdueshëm pozitiv ose CPAP (Continuous Positive Airway Pressure) nuk tolerohet. Ekzistojnë dy kategori aparaturash, ato që mbajnë gjuhën në pozicion anësor (TRD, Tongue Retaining Device) dhe ato që ripozicionojnë mandibulën (MRA, Mandibular Repositioning Appliances).

Barnat hipnotike

Në fund duhet t'i kushtohet vëmendje e veçantë pacientëve që janë në terapi me hipnotikë për trajtimin e pagjumësisë. Në këto raste këshillohet të vlerësohet prania e prodhimit të pakët të pështymës dhe të korrigjohet, nëse është e nevojshme, me një hidratim të saktë, përdorimi i zëvendësuesve të pështymës dhe nxitja e gjëndrave të pështymës.