Stomatologjia minimale invazive. Sa njihet dhe aplikohet nga dentistët?

Stomatologjia minimale invazive (MID) bazohet në trajtime jashtëzakonisht konservatore që synojnë të mbajnë dhëmbët funksionalë për gjithë jetën dhe të lirë nga kariesi.

Qëllimet e MID-së arrihen duke ndjekur strategji të rëndësishme duke përfshirë vlerësimin e rrezikut të sëmundjes dhe planifikimin e kujdesit, kontrollin dhe parandalimin e sëmundjeve, menaxhimin dhe riparimin kirurgjik minimal invaziv në vend të zëvendësimit total të restaurimeve.

Hulumtimet tregojnë, për shembull, se dentistët që nuk kryejnë rregullisht vlerësimin e rrezikut të kariesit (CRA) ose nuk japin këshilla dietike, kanë më shumë gjasa të miratojnë një qasje invazive.

Një rishikim sistematik i kohëve të fundit me metaanalizë (Innes, 2017) ka trguar se një përqindje e lartë e stomatologëve ende ndërhyjnë në mënyrë tepër invazive në lezionet karioze, prandaj duhet të rekomandohen terapi më pak invazive dhe trajtime më konservative në praktikën klinike.

Tipologjia e kërkimit dhe modaliteti i analizës

Në një rishikim sistematik të botuar në "Journal of Dentistry", autorët kanë vlerësuar njohuritë, zbatimin dhe praktikën klinike të stomatologëve (KAP) të stomatologjisë minimale invazive (MID).

Në këtë rishikim janë përfshirë edhe studimet ndërseksionale që analizojnë rezultatet e KAP për MID.

Dy recensues të pavarur përzgjodhën studimet e përfshira, fillimisht në bazë të titujve dhe abstrakteve dhe në fund në tekste të plota. Cilësia metodologjike e studimeve u vlerësua duke përdorur listën kontrolluese të vlerësimit kritik të Institutit Joanna Briggs për Studimet e Prevalencës.

U krye një metaanalizë proporcionale duke përdorur një model të efekteve rastësore për analizën e të dhënave. Për të vlerësuar heterogjenitetin u përdorën testi Q i Cochran-it dhe I2 statistikore.

Rezultatet

Nga 2079 studimet e identifikuara fillimisht, dymbëdhjetë u përfshinë në rishikimin përfundimtar. Metaanaliza u bazua në të dhënat nga dhjetë studime (n = 1728 pjesëmarrës). Njohuritë për MID u rezultuan të ishin 75.66% (95% CI: 69.33-81.48; p <0.01; I2: 97%; Tau2: 0.0456) dhe aplikimi i MID dhe ndërhyrjet praktike në MID u rezultuan të ishin 47.95 % (95% CI: 38,55-57,43; p < 0,01; I2: 98%; Tau2: 0,0743).
Normat më të larta të prevalencës u gjetën në fushën e "dijes" dhe më të ulëtat në zbatimin dhe praktikën klinike.

Konkluzionet

Nga të dhënat e këtij studimi, të cilat duhen vërtetuar edhe në punime të tjera të ngjashme, mund të konkludohet se njohuritë e stomatologëve për lëndën e stomatologjisë MID minimale invazive janë të pranueshme, megjithatë si aplikimi i tij ashtu edhe procedurat klinike të lidhura me to, kanë nevojë për përmirësim.

Megjithatë, punimeve të përfshira në këtë rishikim u mungon konsistenca në metoda dhe ka nevojë për studime të mëtejshme për të qartësuar KAP-në e stomatologëve në mbarë botën.

Implikimet klinike

Të kuptuarit e njohurive dhe mënyrës se si profesionistët e shëndetit oral trajtojnë kariesin është hapi i parë në zgjerimin e stomatologjisë minimale invazive në praktikat dentare. Qëllimi përfundimtar është ndryshimi i praktikës dentare drejt procedurave konservatore minimalisht invazive në mbarë botën.

Për më shumë informacion:

• Innes NPT, Schwendicke F. Restorative thresholds for carious lesions: systematic review and meta-analysis. J Dent Res 2017;96(5):501-8.
• Regina Cardoso de Moura, Pablo Silveira Santos, Patrícia Magno dos Santos Matias, Filipe Colombo Vitali, Leandro Augusto Hilgert, Mariane Cardoso, Carla Massignan. Knowledge, attitudes, and practice of dentists on minimal intervention dentistry: a systematic review and meta-analysis. J Dent 2023;132:104484.