Pirja e duhanit vë në rrezik mikrobiomën orale

Sipas një studimi të botuar në mBIO, përdoruesit e cigareve elektronike kanë një mikrobiomë orale të veçantë që nxit reagime të ndryshme imune të cilat mund të luajnë një rol kryesor në zhvillimin e sëmundjeve të gengivave. "Pirja e duhanit është një faktor rreziku i njohur për zhvillimin e patologjive të mishrave të dhëmbëve, por pak dihet për ndikimin e cigareve elektronike në shëndetin oral, veçanërisht në atë afatgjatë", shpjegon autori kryesor i studimit Deepak Saxena nga Kolegji i Stomatologjisë NYU, SHBA.

Studiuesit ekzaminuan shëndetin oral të 84 të rriturve të ndarë në tre grupe: duhanpirës, përdorues të cigareve elektronike dhe individë që nuk kanë pirë kurrë duhan. Sëmundja e gengivave u vlerësua përmes dy ekzaminimeve dentare me një distancë prej gjashtë muajsh, gjatë të cilave u morën edhe mostrat e pllakave.

Të gjithë pjesëmarrësit kishin disa sëmundje të gengivave në fillim të studimit, situatat më të rënda i kishin duhanpirësit, të ndjekur nga përdoruesit e cigareve elektronike. Pas gjashtë muajsh, studiuesit vunë re se sëmundjet e gengivave ishin përkeqësuar për disa pjesëmarrës në secilin grup, veçanërisht për disa nga përdoruesit e cigareve elektronike. Në rastet e sëmundjeve të gengivave, mishrat e dhëmbëve kanë tendencë të tërhiqen dhe të formojnë xhepa, të cilët janë baza për mbarështimin e baktereve dhe mund të çojnë në patologji më serioze të tyre.

Ekipi hulumtues zbuloi se pas gjashtë muajsh situata e xhepave ishte dukshëm më e keqe vetëm te përdoruesit e cigareve elektronike dhe se bakteret e gjetura në mostrat e pllakave të përdoruesve të këtyre cigareve ishin shumë të ndryshme nga ato të duhanpirësve dhe jo-duhanpirësve. Megjithëse të gjitha grupet ndanin rreth një të pestën e llojeve të baktereve, përbërja e mikrobiomës orale të përdoruesve të cigareve elektronike kishte më shumë të përbashkëta me atë të duhanpirësve sesa me atë të jo-duhanpirësve.

Disa lloje bakteresh, duke përfshirë Selenomonas, Leptotrichia dhe Saccharibacteria, ishin të shumta si te duhanpirësit ashtu edhe te përdoruesit e cigareve elektronike në krahasim me jo-duhanpirësit dhe bakteret e tjera, duke përfshirë Fusobacterium dhe Bacteroidales, të njohura si të lidhura me sëmundjet e gengivave, ishin veçanërisht dominuese te përdoruesit e cigareve elektronike. Studiuesit zbuluan se mikrobioma e përdoruesve të cigareve elektronike lidhej me ndryshimet në mjedisin imunitar të pritësit: TNFa, në veçanti, ishte rritur ndjeshëm në këto subjekte, ndërsa citokinat IL-4 dhe IL-1 ishin më të ulëta.