ADA: Shmangni qaforet e tiroides gjatë ekzaminimeve radiografike

Shoqata Amerikane e Stomatologjisë (ADA) synon përmirësimin e mbrojtjes në radiografinë dentare dhe në tomografinë e kompjuterizuar Cone-Beam, nëpërmjet udhëzimeve të publikuara në...

Shoqata Amerikane e Stomatologjisë (ADA) synon përmirësimin e mbrojtjes në radiografinë dentare dhe në tomografinë e kompjuterizuar Cone-Beam, nëpërmjet udhëzimeve të publikuara në JADA.
Rekomandimet u përditësuan pas diskutimeve me mjekët dhe me Administratën e Ushqimit dhe Barnave së bashku me Akademinë Amerikane të Radiologjisë Orale dhe Maksilo-faciale dhe duke shqyrtuar rreth 100 artikuj, udhëzime dhe rregullore në lidhje me radiografinë. Këshillat bazë të ekspertëve janë: marrja në konsideratë e informacionit të nevojshëm për të vendosur diagnozën, shmangia e radiografive të panevojshme dhe kur janë të nevojshme, kryerja e tyre në zonat e prekura.

Përsa i përket mbrojtjeve individuale për pacientët, sipas rekomandimeve të ADA, nuk duhet të përdoren më si rutinë. Ekspertët përcaktuan se nuk rekomandohet më mbrojtja e zonës së tiroides dhe i asaj abdombinale gjatë radiografisë. Aparaturat moderne të radiografisë digjitale i kufizojnë përmasat e tufës së rrezatimit vetëm në zonën që duhet të ekzaminohet, duke i mbrojtur pacientët nga ekspozimi ndaj rrezatimeve në pjesë të tjera të trupit.

"Përparëset prej plumbi dhe qaforet e tiroides, mund të bllokojnë edhe tufën kryesore të rrezeve X, duke penguar kapjen e imazhit që nevojitet. Në momentin që ndodh kjo, duhet përsëritur testimi dhe radiografitë e panevojshme janë pikërisht ato që duam të shmangim. Synimi kryesor i këtyre rekomandimeve është që mjekët duhet t'i përshkruajnë në mënyrë sa më të kujdesshme radiografitë, me qëllim reduktimin gati në minimum të ekspozimit të pacientëve dhe stomatologëve ndaj rrezatimeve jonizuese", shprehen ekspertët.

Rekomandimet, të cilat vlejnë për çdo pacient, pavarësisht moshës apo gjendjes shëndetësore, si shtatzënia, vijnë si këshilla për dentistët, në mënyrë që t'i mbrojnë pacientët nga ekspozimi i panevojshëm ndaj rrezatimeve dhe:
• Të përshkruajnë radiografi për përmirësimin e informacioneve të diagnostikimit dhe të rezultateve të kurës dhe të bëjnë çdo përpjekje për përdorimin e imazheve të përftuara nga ekzaminime të mëparshme
• Të preferojnë përdorimin e filmave digjitalë, kundrejt atyre konvencionalëve
• Të kufizojnë përmasat e tufës së rrezeve në zonën që duhet të vlerësohet.
• T'i pozicionojnë pacientët siç duhet, me qëllim që të kapin imazhin më të mirë.
• Të përdorin CBCT vetëm kur opsionet me ekspozim të ulët nuk japin informacionet e nevojshme të diagnostikimit
• Të pajtohen me të gjitha normat federale, shtetërore dhe rajonale të zbatueshme për sa u përket sigurisë dhe rrezatimeve.