Parandalimi i kariesit gjatë fëmijërisë së hershme dhe parashkollore

Në një analizë u raportua se prevalenca mesatare e kariesit në fëmijërinë e hershme (ECC) te fëmijët 3-, 4- dhe 5-vjeçare në mbarë botën arrin respektivisht 43%, 55% dhe 63%. Këto...

Në një analizë u raportua se prevalenca mesatare e kariesit në fëmijërinë e hershme (ECC) te fëmijët 3-, 4- dhe 5-vjeçare në mbarë botën arrin respektivisht 43%, 55% dhe 63%. Këto të dhëna janë alarmante, pasi pasqyrojnë faktin se pothuajse gjysma e fëmijëve parashkollorë mund të preken nga ECC, duke theksuar nevojën urgjente për strategji parandaluese efektive.

Fluori është thelbi i menaxhimit terapeutik dhe parandalues jo invaziv i lezioneve të kavituara të kariesit dhe i atyre jo të kavituara (të quajtura edhe si njollat e bardha- WSL).

Terapia lokale me fluor në trajtë ngjyrosësi ofron një përqendrim të lartë e të gjatë të fluorit në sipërfaqen e dhëmbëve për një periudhë të gjatë, si dhe përbën një depozitë jetëgjatë të joneve të kalciumit dhe fluorurit në kavitetin oral.

Aktualisht, përveç ngjyrosësit konvencional me fluor, i cili përmban 5% fluorur natriumi (NaF), në treg janë të disponueshëm shumë ngjyrosës të rinj me formula novatore që synojnë një parandalim më të madh të ECC. Në veçanti, këta ngjyrosës kanë përbërje qumështi, si fosfopeptidi i kazeinës dhe kalciumi amorf.

U raportua se fosfati (CPP-ACP) rimineralizon shtresat më të thella të lezioneve të kariesit të smaltit duke lëshuar jone aktive që e mbajnë një mjedis të mbingopur. Në ngjyrosësit me bazë CPP-ACP, CPP lidhet me ACP, aglomerohet në nanoklustera dhe rregullon madhësinë e joneve të kalciumit dhe fosfatit, duke favorizuar përhapjen e joneve në shtresat më të thella.

Një tjetër teknologji rimineralizuese me bazë kalciumi që përmban fosfat trikalciumi të funksionalizuar (fTCP) është projektuar për të frenuar demineralizimin e smaltit, duke çliruar nivele të larta të joneve të kalciumit, fosfatit dhe fluorit e duke parandaluar ndërveprimet e parakohshme fluor-kalcium.

Megjithatë, shumica e kërkimeve mbi këta ngjyrosës të rinj fluori, aktualisht janë të kufizuara në studime in vitro dhe efikasiteti i tyre klinik nuk është vlerësuar ende plotësisht.

Tipologjia e kërkimit dhe metoda e analizës
Në një studim të randomizuar të kontrolluar, dyfish të verbër, autorët kanë krahasuar efikasitetin e dy ngjyrosësve me 5% fluorur natriumi (NaF) që përmbajnë fosfopeptid kazeine, fosfat të kalciumit amorf (CPP-ACP) ose fosfat trikalciumi (TCP), me ngjyrosësin tradicional 5% NaF në parandalimin e kariesit gjatë fëmijërisë së hershme (ECC) te fëmijët parashkollorë me rrezik të lartë.

Në këtë studim, autorët rekrutuan 582 fëmijë të shëndetshëm 3-4-vjeçarë me të paktën një lezion kariesi (të prekavituar ose të kavituar) pas pëlqimit me shkrim nga prindërit e tyre.

Duke përdorur një tabelë me numra rastësorë të gjeneruar nga kompjuteri, fëmijët u ndanë në mënyrë të randomizuar në 3 grupe:
• Grupi i kontrollit (196 fëmijë), të cilëve iu aplikua 5% NaF tradicionale
• Grupi eksperimental 1 (193), të cilëve iu aplikua 5% NaF me TCP
• Grupi eksperimental 2 (193), të cilëve iu aplikua 5% NaF me CPP-ACP. Aplikimet u kryen çdo 3 muaj për 24 muaj.

Rezultatet
Incidenca e kariesit të ri në harkun e 2 viteve ishte 59.2% në grupin 2, 65.1% në grupin 1 dhe 66.1% në grupin e kontrollit. Rritja mesatare nuk ishte domethënëse midis 3 grupeve në lezionet e kavituara, si dhe në lezionet e pakavituara të kariesit. Nuk u vërejt asnjë ndryshim domethënës në shpërndarjen e ngjyrosësit total të fluorit midis tre grupeve.

Për më tepër, nuk u gjet asnjë ndryshim domethënës gjatë krahasimit të rezultateve midis numrit të ndryshëm të aplikimeve të ngjyrosësit me fluor, të marra nga fëmijët në secilin grup.