Ushtrimet për parandalimin e rënies së funksioneve orale

Në vitin 2050, 25% e popullsisë së botës do të jetë mbi 60 vjeç. Sëmundjet, si kariesi, periodontopatitë, humbja e dhëmbëve dhe kanceri oral mund të ndikojnë negativisht në...

Në vitin 2050, 25% e popullsisë së botës do të jetë mbi 60 vjeç. Sëmundjet, si kariesi, periodontopatitë, humbja e dhëmbëve dhe kanceri oral mund të ndikojnë negativisht në shëndetin e përgjithshëm të të moshuarve. Projekti OHAP, i nisur nga Federata Botërore e Stomatologjisë (FDI) në vitin 2015, synon të përfshijë shëndetin oral në politikat e shëndetit publik për të moshuarit, duke nxitur studimet dhe duke ofruar zgjidhje praktike për përmirësimin e parandalimit dhe trajtimit të sëmundjeve orale.

FDI po e përditëson vazhdimisht seksionin që i përket projektit mbi shëndetin oral të popullsisë që po plaket, me materiale informuese dhe mjete të ndryshme.

Një ndër mjetet që janë në dispozicion të stomatologëve është një pyetësor online, që u mundëson të përcaktojnë dobësinë klinike të individëve 65 vjeç e lart. Një tjetër mjet në dispozicion të dentistëve tregon, nëpërmjet ilustrimeve, disa ushtrime për parandalimin e rënies së funksioneve të përtypjes dhe të funksionit oral në përgjithësi.

Ja, disa nga këshillat:
1. Përmirësoni lëvizjet e gojës dhe të gjuhës, si dhe prodhimin salivar, me qëllim forcimin e muskujve të buzëve, të faqeve, të gjuhës dhe përreth gojës.

Ushtrim për muskujt e gojës, i përqendruar te buzët:
• Shtrëngojini buzët, d.m.th., duke i shtrënguar buzët së bashku për të formuar një palosje të vogël dhe për t'i bërë ato të dridhen.
• Hapeni gojën horizontalisht, duke shqiptuar tingullin "Eee". Përsëriteni 10 herë.

Ushtrim për muskujt e buzëve dhe faqeve:
• Fryjini faqet me ajër ose ujë.
• Shtrëngojini buzët disa herë.

Masazhim i gjëndrës parotide: Masazhojeni me gishta pjesën përpara veshëve (afër dhëmbit superior posterior) 10 herë.

Ushtrimi për gjuhën:
• Shtypeni gjuhën në pjesën e brendshme të faqes.
• Shtypeni majën e gjuhës me një gisht nga jashtë. Përsëriteni 10 herë për secilën nga faqet.

Ushtrimi PATAKARA (termi është origjinal nga anglishtja):
• Shqiptoni "Pa" dhe përplasni buzët.
• Shqiptoni "Ta" dhe pozicionojeni majën e gjuhës në anën e brendshme të dhëmbëve anteriorë superiorë.
• Shqiptoni "Ka" dhe pozicionojeni bazën e gjuhës në pjesën e pasme të qiellzës superiore.
• Shqiptoni "Ra" dhe shtrëngoni gjuhën.
• Bëni dy sete nga tetë përsëritje për çdo shqiptim.

2. Përmirësoni kapacitetin e gëlltitjes, me qëllim forcimin e muskujve të nevojshëm për gëlltitjen, duke ndihmuar në reduktimin e problemeve të gëlltitjes dhe simptomave të lidhura me të.
Ushtrim për gëlltitjen:
• Nxirreni pak gjuhën jashtë.
• Mbylleni gojën dhe gëlltisni salivën. Përsëriteni 10 herë.

Ushtrimi i ballit:
• Shtypeni ballin me pëllëmbën e hapur të dorës.
• Numëroni deri në pesë duke parë kërthizën. Përsëriteni 10 herë.

Ushtrimi i hapjes së gojës:
• Hapeni ngadalë gojën dhe mbajeni hapur për 10 sekonda.
• Mbylleni gojën fort për 10 sekonda. Përsëriteni 10 herë.

3. Përmirësoni kapacitetin e përtypjes

Ushtrimi i përtypjes:
• Uluni duke mbajtur qëndrimin e duhur.
• Përtypni një çamçakëz për 2 minuta me ritëm konstant dhe më pas 3 minuta lirshëm.
• Mbyllini buzët dhe përtypni fort.
• Përtypni në mënyrë uniforme në të dyja anët.

Ushtrimi i numërimit:
• Gjatë vakteve, numëroni deri në 30, ndërkohë që përtypni çdo kafshatë.
• Përdorni përbërës elastikë të prerë në copa pak më të mëdha.
• Përqendrohuni plotësisht në përtypje, duke shmangur shpërqendrimet, si TV.

4. Përmirësoni kapacitetin e gjuhës, me qëllim shmangien e mbytjes me ushqim dhe lëngje.
Trajnimi i gjuhës:
• Nxirreni gjuhën jashtë.
• Përpiquni të prekni qendrën e qiellzës së poshtme me gjuhë.
• Përpiquni të kapni majën e hundës me gjuhë.
• Lëvizeni gjuhën në formë rrethi.
• Shtypni gjuhën me lugë dhe shtyjeni gjuhën drejt lugës.
• Mbajeni për disa sekonda. Përsëriteni 10 herë.

5. Përmirësoni shqiptimin, për një komunikim më të qartë dhe shprehi fytyre më të mira.

Ushtrimet ngatërruese
• Përsërisni fjali ngatërruese si "Kupa me kapak, kupa pa kapak".
• Përsëriteni tre herë duke ekzagjeruar lëvizjet e gojës.