Cilët janë faktorët që ndikojnë në saktësinë e skanimeve orale në implantologji?

Teknikat e gjurmëve digjitale përfshijnë përdorimin e trupave të skanimit intraoral, kapakëve që vihen në implantet themelore për të vazhduar me skanimin...

Teknikat e gjurmëve digjitale përfshijnë përdorimin e trupave të skanimit intraoral, kapakëve që vihen në implantet themelore për të vazhduar me skanimin intraoral (IOS) dhe për të gjeneruar të dhëna virtuale rreth pozicionit të implantit dhe strukturave përreth.

Gjurmët digjitale mund të krijojnë një model 3D të gjeneruar nga kompjuteri në një kohë më të shpejtë sesa ai i krijuar me teknikat konvencionale, pa shkaktuar të përziera dhe shqetësim te pacientët.

Në studimet e literaturës janë evidentuar disa ndryshore që mund të ndikojnë në saktësinë e skanimit, si struktura e trupit të skanimit, sistemi i skanimit, pozicioni i implantit dhe kompetencat e operatorit. Gjithsesi, nga disa studime ka rezultuar se karakteristikat implantare të trupit të skanimit (ISB) mund të ndikojnë në saktësinë e skanimeve intraorale në implantologji.

Në një analizë sistematike, autorët u përpoqën të kërkojnë dhe identifikojnë faktorët që ndikojnë në saktësinë e skanimeve intraorale në implantologji, duke u kushtuar një vëmendje të veçantë trupave të skanimit (ISB).

Gjashtëmbëdhjetë studime i përmbushën kriteret e specifikuara dhe u përfshinë më pas në analizën sistematike. Për shkak të ndryshoreve në metodologjinë e studimeve të përfshira, krahasimi statistikor i rezultateve nuk ishte i mundur, prandaj autorët zgjodhën një qasje të analizës përshkruese, duke njohur heterogjenitetin e qenësishëm të të dhënave të analizuara në literaturë.

Saktësia e rezultateve të skanimit virtual varet nga karakteristika të ndryshme të ISB dhe të implanteve. Këta faktorë përfshijnë pozicionimin e tyre në brendësi të harkut dentar, strukturën, formën, materialin përbërës, ngjyrën dhe sistemin e prodhimit, të cilat kontribuojnë në saktësinë e skanimit.

Gjithashtu, duhet vlerësuar më në detaje lloji i skanerit intraoral (IOS), teknika e skanimit, përdorimi i mjeteve ndihmëse për skanimin, distanca ndërimplantare, intervali i skanimit dhe numri i implanteve.

Nga të dhënat e kësaj analize, arrihet në përfundimin se skanimi intraoral me trup skanimi (ISB) demonstron një saktësi të krahasueshme me metodat tradicionale të gjurmimit, sidomos në skenarë me një implant të vetëm dhe me hapësirë të shkurtër. Gjithsesi, të dhënave ekzistuese u mungojnë informacionet e nevojshme mbi zbatimet in vivo, me qëllim formulimin e rekomandimeve klinike.

Kjo analizë hedh dritë mbi faktorët thelbësorë që ndikojnë në saktësinë e skanimit intraoral në implantologji. Natyra dinamike e patologjive intraorale, e kombinuar me tablonë në zhvillim të teknologjive të skanimit, thekson rëndësinë e një vërtetimi të vazhdueshëm të studimeve.