Mosha ideale për trajtimet ortodontike

Është gabim të mendosh që trajtimet ortodontike aplikohen vetëm te fëmijët dhe të rinjtë në moshë zhvillimi. Shoqata Italiane e Stomatologjisë (SIDO) thekson se trajtimet...

Është gabim të mendosh që trajtimet ortodontike aplikohen vetëm te fëmijët dhe të rinjtë në moshë zhvillimi. Shoqata Italiane e Stomatologjisë (SIDO) thekson se trajtimet mund të jenë të nevojshme edhe për pacientët në moshë madhore.

"Shpesh, ne priremi ta lidhim trajtimin ortodontik me një ndërhyrje që kryhet vetëm te fëmijët dhe adoleshentët në fazë zhvillimi dentoskeletor, në optikën e parandalimit të shëndetit oral. Në fakt, ky trajtim lidhet me shëndetin e kavitetit oral në tërësi dhe mund të jetë e nevojshme të niset terapia në moshën 4-5-vjeçare, ashtu siç mund të propozohet edhe në moshën 80-vjeçare. Nuk ka kufi moshe dhe nuk është kurrë vonë për një trajtim ortodontik", shpjegojnë specialistët e SIDO.

"Faktori kryesor për përcaktimin e një kandidati të mirë për trajtim është shëndeti i dhëmbëve dhe i gingivave. Pra, nevojitet një periodont i shëndetshëm, pa gjakosje. Normalisht, trajtimet e një fëmije në rritje, një të rrituri dhe një të moshuari do të jenë shumë të ndryshme nga njëra-tjetra, por në përgjithësi, mosha nuk është kundërindikacion për lëvizjen e elementeve dentare", shtojnë ata.

Sipas SIDO-s, duhet të kujtojmë që çelësi i suksesit të një trajtimi është diagnostikimi i saktë dhe cilësia e rezultatit qëndron në ndërdisiplinaritetin e qasjes klinike për zgjidhjen e çfarëdolloj problemi ortodontik. Nga kjo pikëpamje, rezultatet më të mira arrihen kur ekziston një bashkëpunim virtuoz ndërmjet stomatologëve, me qëllim propozimin dhe përcaktimin e trajtimit më të mirë "të personalizuar" për çdo pacient.