A janë gati dhëmbët e pacientëve tuaj për të shkuar me pushime?

Dhimbja e dhëmbit, apo një problem me ndonjë nga kurorat, ose protezat mund të kthehet në shqetësim gjatë pushimeve, por në disa raste mund të parandalohet. Ja...

Dhimbja e dhëmbit, apo një problem me ndonjë nga kurorat, ose protezat mund të kthehet në shqetësim gjatë pushimeve, por në disa raste mund të parandalohet.

Ja, disa këshilla, të cilat edhe pse duken banale, mund të jenë të dobishme për pacientët tuaj.

Mbajeni gojën të hidratuar: me temperaturat e larta tipike gjatë verës, organizmi humbet ujë, duke nxitur kështu ndjesinë e një goje të thatë, e cila është një nga shenjat e para të dehidratimit. Me qëllim rikthimin e lëngjeve të humbura për shkak të djersitjes, duhet të pini të paktën 2 litra ujë në ditë, me qëllim që të nxisni prodhimin salivar dhe të luftoni bakteret patogjene, duke i mbrojtur dhëmbët nga kariesi. Këshillohet të kufizoni konsumin e pijeve me sheqer dhe atyre alkoolike, pasi mund të shkaktojnë dehidratim dhe prishje të dhëmbëve.

Ushqehuni shëndetshëm: gjatë pushimeve konsumohet shpesh ushqim jashtë shtëpisë dhe kjo mund të shtojë rrezikun për pllakë dentare. Edhe pse është normale të bëni ndonjë lëshim, duhet të konsumoni produkte të freskëta (fruta, perime), si peshku dhe vaji i ullirit. Nga ana tjetër, nuk duhet të abuzojmë me ëmbëlsirat dhe ushqimet e përpunuara, pasi nivelet e larta të sheqerit në to shtojnë rrezikun për karies.

Mbani një higjienë të mirë orale: lajini dhëmbët të paktën dy herë në ditë për dy minuta me një pastë me përmbajtje fluori, në mëngjes dhe në darkë, duke përdorur edhe fillin dentar. Në rastet kur nuk mund t'i lani dhëmbët (në raste të jashtëzakonshme), mund të përtypni çamçakëzin me ksilitol pasi të keni ngrënë, edhe pse kjo nuk e zëvendëson në asnjë rast furçën.

Mbrohuni nga dielli: ashtu siç mbrojmë lëkurën, duhet të aplikojmë edhe kremra me faktor mbrojtës nga dielli dhe të shmangim ekspozimin e tepërt në diell, me qëllim parandalimin e lezioneve dhe kancerit të buzëve.

Shmangni frakturat dentare: traumat shtohen me ardhjen e pushimeve, kështu që është e nevojshme të përdorni mjete mbrojtëse për gojën, sa herë që kryeni sporte kontakti. Në po të njëjtën mënyrë, nuk këshillohet të kafshoni akull ose objekte të forta, pasi ky veprim vë në rrezik shëndetin e dhëmbëve.

Ndaloni së tymosuri: gjatë pushimeve reduktohet stresi dhe ky mund të jetë një moment i mirë për ta ndërprerë këtë ves të dëmshëm, i cili së bashku me alkoolin, është një nga faktorët kryesorë të rrezikut për tumor të kavitetit oral.

Këshillohuni me dentistin: një vizitë kontrolli përpara se të niseni me pushime është një mënyrë e mirë për t'u siguruar që dhëmbët dhe gingivat janë në gjendje të mirë, duke krijuar mundësinë e parandalimit të çfarëdolloj patologjie që mund të shkatërrojë këto ditë pushimi.