Strategjia e re e vaksinimit terapeutik kundër karcinomës orale

Synimi i një studimi të publikuar në Frontiers in Immunology ishte gjetja e një strategjie vaksinimi terapeutik kundër karcinomës sëkavitetit oral. Me më shumë se...

Synimi i një studimi të publikuar në Frontiers in Immunology ishte gjetja e një strategjie vaksinimi terapeutik kundër karcinomës së kavitetit oral.

Me më shumë se 300.000 raste të diagnostikuara çdo vit në botë, kanceri oral përbën një nga tumoret më të shpeshta te njeriu, edhe pse njihet më pak se të tjerët. Pavarësisht përparimeve të kirurgjisë dhe mjekësisë onkologjike, si përdorimi i imunoterapisë, prognoza e mbijetesës nga ky tumor ka mbetur e qëndrueshme për dekada me radhë, pa përmirësime të mëdha, të vlerësuara në 50-60%. Për këto arsye, duhet me patjetër të zbatohen strategji të reja terapeutike, që të mund të përmirësojnë trajtimin dhe parandalimin e recidivave të kësaj neoplazie të rrezikshme.

"Ky studim, ka ardhur si vazhdim i studimeve të tjera të kryera prej vitesh në fushën paraklinike mbi tipologji të ndryshme tumoresh. Në veçanti ne kemi përcaktuar një strategji imunologjike, e cila lejon rekrutimin e një popullsie të veçantë limfocitesh, të ashtuquajtura limfocite ndihmëse T, në indin tumoral e më pas kapjen e tumorit dhe aktivizimin e limfociteve të tjera, të quajtura T citotoksike, të cilat do të jenë përgjegjëse për eliminimin e qelizave neoplastike. Është sikur armiku (tumori) të jetë bërë më i dallueshëm nga oficerët e ushtrisë (ndihmësit T) të cilët do të vendosin të rekrutojnë ushtarët dhe armët më të përshtatshme për eliminimin e tij", shpjegon një nga autoret e studimit, Greta Forlani.

Strategjia e re bazohet në ndryshimin e qelizave tumorale në mënyrë që t'i tregojnë limfociteve ndihmëse T, antigjenet e tyre tumorale, të cilat shpesh fshihen gjatë rritjes së neoplazisë.

Teknika e përdorur konsiston në futjen e gjenit Ciita në qelizat tumorale. Tumori, i ndryshuar në këtë mënyrë, shfaq receptorët, molekulat HLA të klasit II, që drejtojnë antigjenet tumorale të fshehura në sipërfaqet qelizore për t'u njohur nga limfocitet ndihmëse T, duke shkaktuar kështu një përgjigje imunologjike të aftë për të refuzuar tumorin ose për të frenuar fuqishëm rritjen e tij.

Bëhet fjalë për një strategji të re që mund të përkufizohet si "vaksinim terapeutik" dhe që në rastin e kancerit oral mund të praktikohet direkt në indin patologjik, pasi lokalizohet në një zonë lehtësisht të aksesueshme. Kjo strategji mund të sjellë një fuqizim rrënjësor të terapive imunologjike, kufiri më i fundit në fushën e kërkimit onkologjik.