Metodikat e reja në diagnostikimin e njollave të bardha dhe trajtimi i duhur

Lezionet me njolla të bardha (nga anglishtja “white spots”), përbëjnë stadin e parë të kariesit dentar dhe prevalenca e tyre është shtuar gjatë viteve të fundit, duke arritur...

Lezionet me njolla të bardha (nga anglishtja "white spots"), përbëjnë stadin e parë të kariesit dentar dhe prevalenca e tyre është shtuar gjatë viteve të fundit, duke arritur në 10-49%.

Ato shfaqen shpesh te pacientët që iu nënshtrohen trajtimeve ortodontike dhe zakonisht shkaktohen nga grumbullimi i pllakës bakteriale në zonën cervikale të dhëmbit. Nga ana klinike, pamja e lezionit është në ngjyrë të bardhë të errët, për shkak të fenomenit optik të shkaktuar nga humbja e mineraleve dhe nga ndryshimi në indeksin e rifraksionit të ujit dhe ajrit që mbush hapësirat formuese të smaltit. Kjo është arsyeja pse njollat e bardha shfaqen të bardha dhe me pak tejdukshmëri, pasi ka një rritje të porozitetit të smaltit.

Në mënyrë tradicionale, metodat e diagnostikimit të njollave të bardha janë ekzaminimi vizual dhe fotografik. Megjithatë, vitet e fundit kanë dalë disa metoda të reja diagnostikimi, si fluoreshenca (fluoreshenca DIAGNOdent), mikroradiografia dhe tomografia e mikrokompjuterizuar.

Aktualisht, këto teknika po aplikohen ende si mjete studimi in vitro, por me shtimin e njohurive, mund të zbatohen edhe në fushën klinike në të ardhmen. Ekzistojnë trajtime të ndryshme të njollave të bardha, duke filluar që nga metodat më invazive te zgjidhjet më të kufizuara, që priren t'i ruajnë sa më shumë strukturat dentare. Në konceptin e ruajtjes, mund të merren në konsideratë disa strategji, si udhëzimet për higjienën orale, përshkrimi i fluorurëve lokalë, tabletat me përmbajtje fluori, përdorimi i kazeinës fosfopeptid-fosfat e kalciumit amorf dhe rezina infiltruese.

Në një studim, autorët u përpoqën të kuptojnë nëse mjetet e reja të diagnostikimit si fluoreshenca, mikroradiografia dhe mikrotomografia e kompjuterizuar mund ta kushtëzojnë trajtimin konvencional të njollave të bardha. U krye një analizë sistematike e studimeve të disponueshme në literaturë dhe një kërkim manual për identifikimin e artikujve që kanë të bëjnë me këtë çështje.

Nga kjo analizë, rezultoi se lloji i mjetit të diagnostikimit nuk ka kapacitetin të ndryshojë zgjedhjen e stomatologut përsa i përket trajtimit më të mirë që duhet ndjekur, qoftë një metodë konvencionale, qoftë një më e specializuar.